La nueva see na que se va reasitiar el Centru de Crisis pa Víctimes de Violencia Sexual va caltener n’Uviéu. Asina consta nel concursu públicu que se publicó nel Boletín Oficial del Principáu (Bopa) pa la compra, per parte del Executivu autonómicu, del inmueble que va acoyer les sos instalaciones, que sal a llicitación en 1,5 millones y cuenta con financiamientu de los fondos europeos Next Generation.
L’edificiu tien de disponer d’una superficie mínima construyida de 750 metros cuadraos, distribuyíos, siquier, en dos plantes. Tamién tien de cuntar con una zona axardinada esterior, una distancia de, a lo menos, cinco metros ente la entrada principal y la cai y un accesu pal tráficu rodáu. Igualmente, ha d’atopase en bon estáu de caltenimientu. El plazu pa la presentación de propuestes ye d’un mes.
La compra del inmueble va dexar ampliar y ameyorar los servicios del centru, pioneru a nivel nacional, que dende la so apertura en payares de 2020 atendió yá a más de 840 persones. Tamién va poder afaese a les necesidaes detectaes dende la so entrada en funcionamientu.
El centru de crisis ufierta acompañamientu afechu a les demandes, necesidaes y tiempos de cada muyer. Anguaño cunta con un equipu de siete psicólogues y siete abogaes, amás de la coordinadora. Énte la medría de víctimes menores d’edá, l’añu pasáu incorporóse un equipu esclusivu p’atender estos casos, formáu por una psicólogu y una abogada. El teléfonu 677 985 985 d’atención a les víctimes ta disponible 24 hores, tolos díes del añu, tanto por llamada como por mensaxes de testu y wasap.
