La campaña Selmana Blanca va celebrase nes estaciones d’esquí de Valgrande-Payares y Fontes d’Iviernu dende’l próximu 11 d’avientu y hasta el 7 d’abril de 2024, si les condiciones meteorolóxiques dexen. Les inscripciones pa los centros educativos interesaos en participar van tar abiertes del 2 al 31 d’ochobre. Los pidimientos van tramitase dando preferencia al orde de llegada y al númberu de díes solicitaos.
El programa va poder tener una duración d’unu a cinco díes ya inclúi un cursín de trés hores diaries d’esquí o snowboard, arriendu d’equipu y un forfait gratuitu con accesu a los remontes en funcionamientu para tola xornada. L’actividá puede realizase ensin pernocta o con agospiamientu en réxime de media pensión o pensión completa.
Na Selmana Blanca puede participar alumnáu d’Educación Primaria y Secundaria de centros escolares públicos y concertaos d’Asturies, mesmo que de colexos d’educación especial. El so oxetivu ye fomentar l’esquí ente los estudiantes y averalos al monte y al mediu natural.
Un total 7.743 escolares participaron na Selmana Blanca mientres la temporada pasada. Valgrande-Payares recibió a 3.342 neños y neñes de 70 colexos y Fontes d’Iviernu, a 4.101 de 92 centros.
