El Gobiernu d’Asturies punxo en serviciu en Corvera, en fase de pruebes, la nueva tarxeta CONECTA pa mozos menores de 25 años residentes nel conceyu, que van poder emplegar esti nuevu sistema pa movese gratuitamente n’autobús dientro de la zona 2 del Consorciu de Tresportes d’Asturies (CTA): Avilés, Castrillón, Corvera, Gozón ya Illas. Llueu van incorporase a esti serviciu les llinies de cercaníes de Renfe, que yá cunten con gratuidá pa tolos viaxeros recurrentes, independientemente de la so edá.
La Conseyería de Mediu Rural y Cohesión Territorial y el Conceyu de Corvera suscribieron un conveniu pa promover la movilidá segura, sostenible y conectada ente la mocedá del conceyu. Hasta agora cursáronse más de 200 solicitúes na oficina municipal p’aportar a esti serviciu. Amás, más de 500 residentes en Corvera solicitaron la nueva tarxeta CONECTA, dos selmanes dempués de la so presentación. Pa llograla, namás ye necesariu descargase l’aplicación CONECTA, disponible nes plataformes pa sistemes Android y iOS, introduciendo la busca CTA CONECTA. Esti serviciu, que facilita y simplifica l’usu de la rede, forma parte de la estratexa del Principáu pa modernizar y dixitalizar el tresporte públicu y fomentar la movilidá sostenible.
Una vegada descargada l’aplicación, los usuarios pueden solicitar la nueva tarxeta monederu emplegando un sistema de reconocencia de documentos y verificación d’identidá. La nueva tarxeta CONECTA va unviase directamente a la casa y los usuarios van recibir nun corréu electrónicu les claves de la área personal, na que van poder xestionar les distintes opciones de la so cuenta. Cuando esta tarxeta reemplace dafechu a l’actual, dende l’aplicación CONECTA podrá consultase l’hestóricu de viaxes realizaos o recargar el saldu averando la tarxeta al terminal móvil.
El funcionamientu de la nueva tarxeta ye cenciellu. Una vegada operativa, l’usuariu va poder cargar el saldu que desee, y el sistema dirá descontándo-y automáticamente’l costu de cada viaxe que realice, aplicando siempres la tarifa más rentable, hasta llegar a un máximu mensual de 30 euros. A partir d’esa cantidá, va pasar a aplicase automáticamente la tarifa CONECTA 30, que dexa viaxar de forma illimitada por tola comunidá por 30 euros al mes, polo que nun va ser necesariu recargar saldu hasta que nun se camude de mes.
Amás, la nueva aplicación dexa planiar viaxes multimodales por aciu la xeolocalización de la posición del usuariu, amosándo-y toles paraes cercanes al so allugamientu y apurriendo tola información relativa a les llinies y frecuencies de camín que puede utilizar. Amás, al traviés d’un intuitivu menú, amuesa los itinerarios de cada llinia y les paraes intermedies. Bien llueu va dexar visualizar tamién nun mapa y en tiempu real la situación de cada vehículu y el tiempu estimáu de llegada a cada parada.
