El Conceyu de Xixón habilitó’l pabellón de deportes La Teyerona p’allugar a les persones ensin llar. Asina se decidió esta mañana nuna xunta del grupu d’acción social, integráu pola Delegación del Gobiernu, el Gobiernu asturianu, los conceyos de Xixón y Uviéu, Protección Civil d’Asturies y la Federación Asturiana de Conceyos.
El dispositivu va tar xestionáu por Cruz Roja y Protección Civil y reforzáu por un serviciu de vixilancia del que s’encarga’l Conceyu de Xixón. Trátase d’una midida qu’acaba de decidise y que yá ta en marcha. Nestos momentos, el pabellón yá foi desinfestáu y tase asitiando’l bateco pa cubrir el suelu. A primer hora de la tarde asitiaránse les 100 cames pa les que l’equipamientu tien capacidá. L’oxetivu ye abellugar a toles persones que tán na cai nestos momentos y facilitar el llabor d’equipamientos como l’Albergue Cuadonga o la Cocina Económica.
