El conseyeru de Fomentu, Cooperación Local y Prevención de Quemes, Alejandro Calvo, activó’l pasu del Plan de Quemes Forestales d’Asturies (Infopa) a fase d’emerxencia en situación 0 por cuenta de la presencia de focos de quemes y l’alerta naranxa pola torbonada Karlotta. Esti nivel dexa activar tolos efectivos de vixilancia, prevención y estinción del Gobiernu d’Asturies.
Esta situación implica que queden suspendíes toles autorizaciones de quemes. Asturies alvierte de que nun se puede baxar la guardia énte’l riesgu de fueu, especialmente poles fuertes raches de vientu y fai un llamamientu a la collaboración de la ciudadanía por qu’énte cualquier niciu de quema llamen al 112.
Los axentes medioambientales de la conseyería y el Seprona de la Guardia Civil realicen llabores de vixilancia pa identificar actividaes prohibíes y a posibles infractores pa empecipiar los oportunos espedientes sancionadores y de denuncia.
Nestos momentos contabilícense una ventena de quemes forestales nos conceyos de Tinéu, Cangas, Ayande, Llangréu, L.lena, El Valle Bah.u de Peñamellera, Ribadeva, Salas, Siero, Valdés, Cangues d’Onís y Llanes.
L’Infopa permanecía activáu en fase d’alerta, previa a la emerxencia, dende’l 15 de xineru. Esti plan actívase de forma automática, añalmente, coincidiendo coles dómines de peligru altu y mediu que n’Asturies se correspuenden, respectivamente, colos periodos entendíos ente’l 15 de xineru y el 30 d’abril y ente’l 15 de xunetu y el 15 d’ochobre.
