El Gobiernu asturianu solicitó la collaboración de la Delegación del Gobiernu pa desinfestar les residencies de mayores privaes d’Asturies. Concretamente, derivóse’l pidimientu pa desinfestar un primer llote de siete centros privaos nos que se rexistraron casos positivos en COVID-19. La conseyera de Derechos Sociales y Bienestar, Melania Álvarez, destacó que al Executivu asturianu esmolécen-y “toles persones mayores». Nesti sentíu, destacó que «trabayamos pa garantizar la seguridá y el bienestar de tol colectivu, con independencia de que residan nun centru públicu o priváu”.
Les siete residencies que s’incluyen nesti primer llote son Virgen del Carbayo (Llangréu), Plaza Real y Centro Gerontológico Jovellanos (Xixón), Residencia San Pedro (Salas), Residencia Geriátrica San Pancracio (Carreño), Residencia Geriátrica Colegio San Francisco (Villaviciosa), Residencia Doña Manolita (Candamu) y Residencia geriátrica Faustino Sobrino (Llanes). Cualquier solicitú de desinfección debe solicitase a la Conseyería de Derechos Sociales y Bienestar pa esta crisis.
