La Universidá Nacional d’Educación a Distancia (UNED) programa un seminariu de microteatru pal próximu 17 de payares. El formatu de clas maxistral impartíu por Xavier Frías Conde ta especialmente empobináu pa docentes d’asturianu y docentes y estudiantes d’educación infantil. La lliteratura como ferramienta docente nun ye nenguna novedá, de fechu ye base fundamental de la enseñanza y de la cultura. Sicasí, nestos tiempos de consumu paez que too tien que ser curtio, condensao y al momentu; y ésto perxudica gravemente a les formes d’espresión más posaes.
Nesti contestu d’hipervelocidá y consumismu, formatos lliterarios d’estensión curtia como’l microrrellatu tán garrando puxu y caldía podemos atopar más concursos, talleres y producción. Otru xéneru que por desgracia paez nun esfrutar d’un momentu tan feliz, yá de va décades, ye’l teatru. Y ye que’l teatru nun ye sólo l’arte que se pon n’escena sinón que, sacantes la improvisación pura, suel llevar detrás un testu lliterariu. Teniendo too ésto en cuenta, ye natural buscar una manera d’adaptar el xéneru teatral a los tiempos que cuerren, n’especial pensando nel so valir pedagóxicu a dellos niveles. Si’l microrrellatu sirve p’averar la escritura a quien la novela o el rellatu nun llega, el microteatru puede ser la ferramienta análoga nel casu del teatru.
El seminariu de microteatru tien como oxetivu adentrase no que ye un xéneru lliterariu marxinalizáu inxustamente. El teatru, amás de pa representar, sirve pa lleer, como un cuentu, o en voz alta, tornando al antiguu subxéneru del radioteatru. Nesti seminariu, vamos trabayar más que nada col microteatru, un tipu de teatru que nun ye nuevu, pero que malpenes entró nes aules. De fechu, nun hai siquiera testos, máxime en llingua asturiana, polo que xunto cola presentación de la obra El xigante llorón (Cuatro Gotes Ediciones, 2025) veremos cuáles son les característiques d’esti tipu de testos y cómo se-yos pue sacar partíu nes clases de llingua. Propondremos delles actividaes que conduzan a la esplotación del microteatru y mesmo a la creación de testos dramáticos cenciellos. L’obrador sedrá impartíu pol doctor Xavier Frías Conde, autor de Lliteratura Infantil y Xuvenil y docente de la UNED.
La entrada al seminariu de microteatru ye llibre y de baldre, anque hai posibilidá d’inscripción quien quiera recibir un certificáu acreditativu d’asistencia. La información completa y formulariu d’inscripción pueden atopase equí.
