La Universidá d’Uviéu, na xunta ordinaria de Conseyu de Gobiernu celebrada güei, aprobó l’ampliación de places del grau d’Enfermería. En concretu, el títulu impartíu na Facultá d’Enfermería de Xixón va cuntar, pa’l cursu académicu 2023-2024, con siete places más de nuevu ingresu, hasta algamar les 77. En total, los estudios de grau d’Enfermería impartíos na Universidá d’Uviéu, tanto nel centru adscritu de Xixón como na Facultá de Medicina y Ciencies de la Salú, suman 177 places de nuevu ingresu.
Esti aumentu van sumase al yá aprobáu nel Conseyu de Gobiernu del 24 de febreru nel que se dio lluz verde a un aumentu en 15 places pa’l grau de Medicina. Tal que esplicó’l vicerrector d’Estudiantes, Alfonso López Muñiz, dambes ampliaciones reflexen “un importante esfuerciu de la institución, porque, anque siete places nel casu d’Enfermería y 15 nel casu de Medicina nun paezan munches, impliquen una inversión n’infraestructures y en profesoráu”. López Muñiz añedió, sicasí, que “la universidá ye consciente de la necesidá de formar más profesionales nesti ámbitu” y señaló que “l’aumentu nun va suponer en nengún casu una mengua na calidá de la enseñanza”.
L’aumentu de places d’Enfermería recuéyese yá nel documentu aprobáu güei en Conseyu de Gobiernu d’ufierta académica pa los estudios de grau del cursu 2023-2024, nel que tamién se contemplen les places previstes pa les nueves Programaciones Conxuntes d’Estudios Oficiales (PCEOs), más conocíes como doble graos. En concretu, inclúyense como novedaes los dobles graos d’Inxeniería Informática del Software y Matemátiques (10 places), el de Ciencia ya Inxeniería de Datos ya Inxeniería en Tecnoloxíes y Servicios de Telecomunicación (5 places) y el de Ciencia ya Inxeniería de Datos ya Inxeniería Informática en Tecnoloxíes de la Información (5 places). El total de les places pa los estudios de grau (incluyendo ingreso vía EBAU más accesu por cambéu d’estudios) ye de 5.407 places.
El Conseyu de Gobiernu aprobó tamién la propuesta de procedimientu de solicitú de places y periodos de matrícula pa les enseñances de grau, que contempla un total de siete axudicaciones. El primer periodu de solicitú de places, correspondiente a la convocatoria ordinaria, va ser ente 19 y el 30 de xunu. La primer axudicación va tener llugar el 17 de xunetu. Como principal novedá, el vicerrector d’Estudiantes, López Muñiz, destacó “una axilización nel procesu, sobremanera a partir de la segunda axudicación -que va ser el 27 de xunetu- p’asina adelantrar los tiempos y llograr una incorporación más temprana de too l’estudiantáu a les clases”. Otra de les novedaes, que tamién s’enllanta coles mires de dotar de más rapidez al procesu, ye que cada estudiante tendrá de confirmar espresamente l’interés por siguir nel procesu d’almisión una vegada prodúzase cada axudicación si nun llogró la plaza deseyada.
