La Universidá d’Uviéu consiguió un proyectu d’investigación, dotáu con casi dos millones d’euros, pa la dotación d’un llaboratoriu singular nel desenvolvimientu de la tecnoloxía de futuros sistemes de comunicaciones como les redes 6G, tanto terrestres como satelitales. La nueva infraestructura va dexar ameyorar y complementar les instalaciones esistentes pa contribuyir al desenvolvimientu y testéu d’antenes y soluciones tecnolóxiques en cobertoria pal esplegue de redes 6G n’interiores, incluyendo bandes de frecuencia de microondes, milimétriques y submilimétriques.
El proyectu tituláu Equipamientu pal desenvolvimientu y caracterización de sistemes en tecnoloxía 6G solicitóse como investigador principal por Manuel Arrebola Baena, profesor del Departamentu d’Inxeniería Eléctrica, Electrónica, de Comunicaciones y de Sistemes, que cuntó col sofitu curricular del equipu d’investigación TSC-UNIOVI, que’l so responsable ye Fernando Las Heras Andrés, catedráticu del mesmu departamentu. El proyectu inscribióse na convocatoria d’Ayudes pal financiamientu d’infraestructures d’investigación, alquisición d’equipamientu científicu-técnicu y proyectos d’I+D en 5G avanzáu del Programa Únicu I+D 6G 2023 del Ministeriu de Tresformamientu Dixital, que ye parte del Plan de Recuperación, Tresformamientu y Resiliencia (PRTR), nel marcu de los fondos Next Generation EU.
El profesor Arrebola sorraya que la concesión d’esti proyectu va dotar a la Universidá d’Uviéu d’una infraestructura “singular y tecnológicamente piquera” que va dexar disponer d’un llaboratoriu para’l desenvolvimientu y testéu de tecnoloxía específica pa la definición y futuru esplegue de les redes d’accesu tantu terrestres como satelitales del sistema 6G. L’actuación contempla, per un sitiu, la meyora de l’actual cámara anecoica de midida y caracterización d’antenes pa dotala de capacidá de midida hasta frecuencies de 300 GHz. Esti tipu de cámares tán diseñaes p’absorber toles reflexones producíes per ondes electromagnétiques en cualesquier de les superficies que la conformen (parés, suelu y techu). De la mesma, atópense aisllaes del esterior de cualquier fonte de ruiu o influencia esterna. Per otru llau, y de manera complementaria, l’ayuda concedida va dexar instalar un sistema pa midíes y caracterización de canales de radiopropagación y enllaces en redolaes indoor. Esta instalación concebida como un rangu d’alquisición planu en redolada non anecoicu va facilitar la esperimentación pa buscar soluciones tecnolóxiques eficientes y óptimes na cobertoria 6G nel interior d’edificios amenorgando l’impactu visual típicu na instalación de sistemes radio y, sobre manera, embriviendo’l consumu enerxéticu.
Finalmente, esta infraestructura va completar con instrumentación de midida complementaria en bandes de frecuencia de microondes, milimétriques y submilimétriques, que son les previstes pa los futuros sistemes de comunicaciones. Tou esti equipamientu ta enfocáu al desenvolvimientu tecnolóxicu de subsistemes que van ser emplegaos nel esplegue de la capa física de la rede 6G, pero tamién van ser compatibles pa los estándares posteriores a 6G.
