La Universidá d’Uviéu, en collaboración cola organización Ayuda Humanitaria pa Ucraína dende Asturies, punxo en marcha una campaña solidaria de recoyida d’alimentos, productos non perecederos y material sanitario coles mires de desaniciar los efectos de la guerra nel país européu.
La campaña va desenvolvese ente’l 2 y el 10 de marzu, dambos inclusive, en distintos centros de los campus universitarios d’Uviéu, Xixón y Mieres. Con esti propósitu, habilitáronse puntos de recoyida en toles facultaes y escueles d’Uviéu, Xixón y Mieres, y nos edificios Científicu Tecnolóxicu y d’Investigación, en Mieres. Tamién hai dellos puntos habilitaos nos edificios de servicios centrales de la universidá pa facilitar la collaboración del personal d’alministración y servicios.
Rebeca Cerezo, directora d’área de Cooperación, Tercer Sector y Responsabilidá Social de la Universidá d’Uviéu, destaca que la institución académica nun puede permanecer indiferente énte la crisis humanitaria que ta causando’l conflictu bélicu n’Ucraína. Cerezo esclaria que “los puntos de recoyida son puramente pa los miembros de la comunidá universitaria que s’espera que, de la mesma, vehiculicen l’ayuda de la so rede de familiares y amigos”.
La organización Ayuda Humanitaria pa Ucraína dende Asturies, que coordina Krystyna Pechena, solicita, prioritariamente, la donación de los siguientes alimentos y materiales:
· Alimentos non perecederos: conserves y potitos.
· Material sanitario: gases, vendajes de too tipu, agua osixenada, yodu, melecines pa quemadures, hemostáticos, analxésicos, antiinflamatorios, pomaes analxésiques, xeringues 2ml, tensiómetros, termómetros, torniquetes y test de antígenos.
· Otros productos: pañales, tanto pa neños como pa persones mayores, cobertores, sacos de dormir, llinternes con piles, pantalones térmicos y rodilleras.
La directora d’área añede que “ye necesariu priorizar los artículos de la llista, una y bones la loxística, nesta situación, supon un problema añedíu y ye importante que llegue l’ayuda más urxente”. Rematada la campaña, la organización va treslladar el material recoyíu hasta Ucraína pa tratar de desaniciar la crisis humanitaria que sufre esti país d’Europa del este.
