El rector de la Universidá d’Uviéu, Ignacio Villaverde, decretó güei l’escenariu naranxa del Plan Marcu pa la Xestión del andanciu na institución académica. El cambéu d’escenariu realízase a la vista de la situación epidemiolóxica actual qu’asitia a Asturies nel nivel d’alerta 3 y teniendo en cuenta los indicadores principales de siguimientu de la Covid-19 del Ministeriu de Sanidá. Villaverde echó voz del cambéu d’escenariu a la comunidá universitaria, a la qu’aseló: “Afortunadamente, los espacios universitarios siguen siendo seguros y, n’ese sentíu, nada camudó. Pero la situación epidemiolóxica n’Asturies aconseya esta decisión como midida de precuru, en llínea col esfuerzu que tamos faciendo toos por caltener l’actividá universitaria y asina poder siguir el cursu de forma presencial”, esplicó.
L’aplicación del escenariu naranxa nun afecta a la presencialidad de los exames que se vaigan a celebrar nos próximos díes y, llegáu’l casu, tampoco afectaría a la presencialidad de les clases una vegada empecípiese’l períodu lectivu d’esti segundu semestre del cursu.
L’escenariu naranxa ta previstu para los próximos 20 díes naturales. Trescurríu esi plazu o si ameyorara la situación epidemiolóxica nestos próximos díes, va revisase la situación y, nel so casu, va realizase un nuevu cambéu d’escenariu. “La Universidá d’Uviéu dotóse d’un preséu, el Plan Marco, que nos dexa actuar con prontitud y responsabilidá énte les distintes circunstancies que puedan asocedese y encarar la situación con axilidá y certidumbre”, esplica Villaverde.
El rector estimó a tola comunidá universitaria -estudiantáu, personal d’alministración y servicios y personal docente ya investigador- “la so responsabilidá, compromisu y sentíu del deber”. “Lo primero ye la salú, pero la Universidá tien de siguir cumpliendo cola so xera, siempres con seguridá y curiáu. Sé que cuntamos con tola comunidá universitaria pa superar esti nuevu retu col mesmu ésitu y normalidá cola que lo fiximos hasta agora”.
