Adrián Barbón emplazó al Gobiernu central a cumplir dellos de los sos compromisos con Asturies, como’l Corredor Atlánticu, el plan de meyora de les cercaníes ferroviaries o’l desbloquéu del conveniu pa aprovechar los terrenes de la fábrica de La Vega, n’Uviéu. Énte’l rei Felipe VI y el presidente Pedro Sánchez, Barbón celebró l’estrenu de la variante de Payares: “A partir de güei, Asturies ta más cerca de creese que tien más futuru que pasáu”, afirmó.
El viaxe inaugural de la variante axuntó nel mesmu vagón al xefe del Estáu, el presidente del Gobiernu d’España, el ministru de Tresportes y los presidentes d’Asturies y Castiella y Llión. En menos de trés hores y media, el ferrocarril cubrió’l percorríu ente la estación de Chamartín, en Madrid, y Uviéu, un tiempu que se va encurtiar más en 2024, cuando entren en funcionamientu los trenes Avril. A partir de mañana, la variante –“una obra de titanes”, según definió’l presidente d’Asturies- va tar abierta al tráficu de pasaxeros y mercancíes.
Yá n’Uviéu/Uviéu, mientres l’actu institucional, Barbón sorrayó l’impactu psicolóxicu de la conexón d’Asturies cola alta velocidá ferroviaria, que va suponer la rotura d’un cercu mental” basáu na sensación d’aislamientu secular”. A partir d’esti día pa la hestoria”, el Principáu va empecipiar “la década del cambéu” con “fame de futuru”.
Sicasí, el presidente nun se quedó nes sensaciones. Con Pedro Sánchez y el ministru Óscar Ponte en primer fila, Barbón numberó reivindicaciones concretes como’l Corredor Atlánticu, les cercaníes ferroviaries, el vial de Xove (Xixón), el soterramientu de Llangréu o’l conveniu de La Vega. Una repasada que-y dio pie a enfatizar que, “con llealtá institucional”, pal Gobiernu “Asturies ye lo primero”, tal que vieno repitiendo nes últimes selmanes.
