L’aeropuertu d’Asturies cancela tolos vuelos regulares

L’aeropuertu d’Asturies cancela dende esti miércoles tolos vuelos regulares. L’aeródromu asturianu namás va abrir les sos puertes p’atender la demanda d vuelos «ensencial» solicitaos poles aerollinies. Desque entró en vixencia l’estáu d’alarma, Iberia y Vueling caltuvieron una operativa mínima n’Asturies. El serviciu enfocóse principalmente a la torna de persones que s’atopaben nel estranxeru. Dende’l 15 de marzu operaron dos vuelos a Málaga, dos a Sevilla, tres a Alicante, unu a Valencia, diez a Barcelona y 25 a Madrid.

La conexón d’autobús col aeropuertu asturianu dende Xixón, Uviéu, Avilés y Castrillón tamién se va ver afectada. Los autobuses van caltener el serviciu nes llegaes y salíes de los vuelos a Madrid qu’Iberia tien programaos pa esti miércoles, el xueves y el domingu. Vueling realizó l’últimu vuelu a Barcelona’l llunes pasáu. Precisamente por esti motivu, el serviciu caltendráse hasta’l domingu pa los usuarios de los vuelos que se siguen operando.  Los autobuses nun tornarán a la terminal dende’l llunes y hasta que se recupere la normalidá operativa, dalgo que nun s’espera hasta, polo menos, el 29 d’abril.