Asturies va tornar a la Feria Internacional de Turismu (Fitur), que se va celebrar en Madrid del 24 al 28 de xineru, con un gran estand de más de 900 metros cuadraos nel que van ser protagonistes el ricu paisaxe del Paraísu Natural y l’alta velocidá ferroviaria, un finxu especialmente relevante pal mercáu madrilanu, destinatariu principal d’esti eventu turísticu que s’asitia ente los trés más importantes del mundu.
El tradicional Día d’Asturies en Fitur va celebrase’l vienres, 26 de xineru, cola presencia del presidente, Adrián Barbón.
El Principáu va presentar na feria la nueva campaña AVE al Paraísu, pa promocionar la llegada de l’alta velocidá a la comunidá. El tren va ocupar un espaciu específicu y destacáu nel espaciu asturianu, nel que’l públicu va poder inmortalizar la so visita nun photocall con forma de vagón de tren y participar nel sortéu d’una escapada a Asturies pa dos persones.
Una pantalla xigante va dar la bienvenida a les persones visitantes con una combinación d’imaxes que conviden a aprovechar la rapidez de l’alta velocidá pa realizar una escapada al paraísu natural.
La imaxe xeneral del pabellón ta inspirada nel paisaxe, l’ecoturismu y el turismu rural. El protagonismu de la naturaleza refléxase nun monte escenográficu ya hiperrealista, con árboles y plantes naturales y artificiales, denomináu monte d’esperiencies, y una galería espositiva que tresllada al visitante a Asturies al traviés de recursos como’l Camín de Santiago, el turismu industrial, la gastronomía y, bien especialmente, el turismu activu, el rural y l’coturismu.
Tamién van cuntar con un escaparate esclusivu dientro del pabellón el turismu activu y deportivo, les marques calidable, como les d’agospiamientu rural, casones y aldegues, y la cultura sidrera, en sofitu a la so candidatura a patrimoniu mundial inmaterial de la UNESCO.
