Nel calendariu deportivu mundial, munches feches queden marcaes a fueu. La final de la Champions League europea o los play-offs de la NBA son namás que dalgunes d’elles. Pero ensin dulda una de les que más rescampla ye la Super Bowl, non solo porque define’l campeón de la NFL, sinón tamién pola so vinculación cola cultura musical. Nel descansu de la final de la National Football League actuaron artistes de talla internacional como Michael Jackson, Beyoncé o los mesmos Rolling Stones. Pero la realidá ye que poques actuaciones van recordase d’igual forma que la ufiertada’l pasáu domingo ocho por Benito Antonio Martínez Ocasio, más conocíu como Bad Bunny.
L’actuación del cantante puertorriqueñu empezaba con una escena ambientada nos campos del so país natal, una situación tópica na que los llabradoes o jíbaros recoyíen la collecha no que paecía un llaberintu de cultivos, representando asina una llarga tradición del país al empar que s’amosaba lo que munchos años fuera esclavitú y sufrimientu por aciu d’un colonialismu, del que Bad Bunny yá alvierte nel so caberu discu. La cámara avérase a unu d’ellos que, con una guitarra, dixo “Que rico es ser latino”, una declaración d’autoría del cantante que buscaba asina atentar escontra los prexuicios estadounidenses pa coles persones del sur del continente. Salía entós Benito portando una pelota de fútbol americanu, representativa del eventu. Cantaba «Titi me preguntó», un de los sos cantares más conocíos. Caminando atopóse con vendedores de cocu frío, tacos y piragües, típicos del so llar, hasta llegar a una casina antroxada como una casa tradicional puertorriqueña, que se tresformaría na pieza central del actu.
Ente otros cantares, Bad Bunny cantó sobre’l techu de la morada “Yo perreo sola”, un cantar de 2020 qu’ataca l’actitú misóxina que se suel llevar nesi xéneru musical. Na antoxana de la casina muyeres y homes baillaben y perreaben a lo xole. Ente eses persones atopábense estrelles como les cantantes Cardi B, Karol G o Young Miko y artistes de Hollywood como Pedro Pascal, toos ellos con nacionalidá o ascendencia llatinoamericana.
De sópitu, n’otru puntu del escenariu apaecía una boda y ente los novios surdía una de les figures de la música más importantes de los Estaos Xuníos: Lady Gaga. La estrella neoyorquina cantó parte del so repertoriu sobre una base de salsa característica del últimu álbum de del coneyu malu. Quiciabes esta collaboración ye la que más cafia en comparanza coles demás, yá que ye la única parte del conciertu na que se fala inglés. Podría interpretase como una representación de la unión ente EE. UU. y Llatinoamérica, o a lo menos de los civiles de norte y sur. Teoríes que circulen añeden el factor de que’l color azul del vistíu de la cantante podría ser referencia a la bandera independentista de Puertu Ricu, portada pol protagonista del actu minutos dempués.
La siguiente figura qu’apaeció acompañando al puertorriqueñu foi’l so compatriota Ricky Martin. Unu de los primeros en destacar nel xéneru y n’afondar nel mercáu musical estauxunidense, que vivió momentos complicaos na industria cuando decidió “salir del armariu” y la so carrera tomó un xiru reivindicativu de la so patria al igual que’l rei del trap. Poro, sentáu nes característiques sielles de plásticu del álbum de 2025 cantaba Ricky Martin “Lo que pasó en Hawaii”, un cantar qu’alvierte sobro’l colonialismu contemporáneu, nuna dómina onde val más recordalo.
Siguía’l conciertu col himnu de resistencia “El apagón”, cantar de 2022 que menta les costantes perdes d’enerxía en Puertu Ricu y que nel so estrenu incluyó un documental sobro les desigualdaes nel país. Facía referencia al gran apagón de 2017 tres el pasu d’un furacán y como los mesmos llabradores punxéronse manes a la obra a solucionar el problema. Por eso, trés jíbaros xubieron a los postes de lluz.
Convién resaltar que, sacantes la intervención de Lady Gaga, l’espectáculu foi enteru n’español, daqué que nunca enantes asocediera nel “Súper Tazón” y qu’ensin dulda sigue cola vena patriota cola que Bad Bunny compunxo’l so últimu discu, el gran ésitu «Debí tirar más fotos», del cual los sos cantares ocupen los puestos de los cinco más escuchaos del artista en Spotify. Nel discu, Benitu fai bases musicales introduciendo ritmos clásicos de la illa y fai un alegatu a les desigualdaes y los abusos de la potencia estranxera nel país, esto ye, d’Estaos Xuníos.
Esa intención de reivindicar la so tierra y les sos costumes, y de criticar l’imperialismu americanu nel so país de xuru sía la gran razón pola que l’artista saliera portando la bandera independentista de Puertu Ricu en gran parte l’actuación. Siendo acompañáu a la fin poles banderes de tolos países d’América, mentó los nomes de toos dende Chile hasta Canadá al berru de “Dios bendiga América” mientres les banderes lu arrodiáben.
Tou esto asocede nun contestu de tensión internacional poles deportaciones masives y los abusos y asesinatos cometíos pola ICE, la guardia d’inmigración. Fai yá unos díes, el mesmu cantante facía declaraciones polémiques nos premios Grammy condergando l’actuación d’estes fuerces abusives y caldiando l’ambiente pal actu de la Super Bowl, que de xuru nun dexó indiferente a naide.
