La conseyera de Cultura, Política Llingüística, Berta Piñán, y el director xeneral de Cultura y Patrimoniu, Pablo León Gasalla, asistieron esti mediudía al actu d’entrega del XI Premiu 13 Roses Asturies, que concede l’asociación del mesmu nome. Nel actu tamién tuvo presente la directora del Archivu Históricu, María Concepción Paredes, quien realizó una visita guiada pel equipamientu públicu a los asistentes.
El gallardón recayó nel Archivu Históricu d’Asturies pol so “trabayu escelente” pa caltener la memoria democrática nel Principáu, amás de “la puesta en valor de los fondos documentales”. Nel eventu destacáronse dellos aspectos, como la llinia de trabayu de la institución pública o la importancia del Archivu Históricu na “recuperación del territoriu y puesta en valor de los fondos documentales”.
L’Archivu Históricu d’Asturies (AHA) acueye gran cantidá de documentos y ye’l centru documental más relevante de la comunidá autónoma.
La institución, creada nel 2005, tien como función fundamental “ser el depósitu preferente del patrimoniu documental asturianu, ponelu a disposición de los ciudadanos y ciudadanes, promover el so arriquecimientu, y fomentar la investigación y la cultura, con una referencia especial a les sos manifestaciones autonómiques”.
L’Asociación Trece Rosas, qu’otorgó la reconocencia al equipamientu cultural asturianu, fundóse nel 2009 y constituyóse colos oxetivos de “promover y sofitar la Llei de Memoria Histórica, lluchar pola igualdá d’homes y muyeres amás de la difusión y estudios de temes culturales sobre muyer y memoria histórica”. Nos últimos años, la so actividá tan intensa abarcó múltiples escenarios y participó n’actividaes del Parllamentu Européu y realizó llargumetraxes documentales o munchos actos d’homenaxe. Dende’l 2010, esti organismu otorga’l Premiu Trece Rosas “a persones que tuvieron una implicación na defensa de la Memoria Histórica o que sufrieron la represión franquista”.
