La Dirección Xeneral de Vivienda completó la construcción de les doce viviendes de promoción pública de L’Arena, en Sotu’l Barcu, que se van destinar al arriendu afayadizu. L’actuación, financiada con fondos europeos Next Generation del Plan de Recuperación, Tresformación y Resiliencia, supunxo una inversión superior a los dos millones.
El director xeneral de Vivienda, Jesús Daniel Sánchez, destacó qu’esta promoción representa “un nuevu conceptu de vivienda pública n’Asturies: viviendes accesibles, eficientes y de máxima calidá, pensaes pa les families trabayadores”. Según esplicó, estes viviendes, xuntu coles yá remataes n’Avilés y Llugones y les que se van dir apurrendo progresivamente en Llugo de Llanera, Xixón, Onís, Colunga, Llangréu, Llaviana, Mieres, Candás y Grau, van contribuyir a tresformar el modelu de vivienda pública na comunidá gracies al so diseñu basáu en criterios de calidá, eficiencia enerxética y accesibilidá.
El director xeneral sorrayó qu’estes promociones tán dirixíes a un colectivu que, magar cuntar con emplegu, atopa series dificultaes p’aportar a una vivienda. “Son pa eses families que cada mañana se llevanten pa trabayar y que, sicasí, nun lleguen con cuenta de mes porque unos salarios insuficientes allóñen-yos d’un mercáu con precios de compra elevaos y arriendos disparaos. Families que s’esfuercien acaldía, pero que los sos ingresos nun crecen al ritmu del costu de la vida y, muncho menos, al ritmu del preciu de la vivienda”, señaló.
Nesti sentíu, recordó que munches d’estes families nun figuren nos rexistros de los servicios sociales, anque soporten una situación económica mui axustada. “Contribúin al sostenimientu de los servicios públicos y al sistema de protección social al traviés de les sos cotizaciones, y yera necesario que tamién percibieren una retornu per parte de l’Alministración. En materia de vivienda, esi retornu empieza a materializase agora”, afirmó.
L’actuación de L’Arena adquier amás una relevancia especial pol so allugamientu nun núcleu rural sometíu a una creciente presión sobre’l mercáu residencial. “Tamos nuna localidá que, magar el so calter rural, tamién sufre l’impactu del turismu, les segundes residencies y les viviendes d’usu turísticu. Too ello enzanca cada vez más que los que quieren vivir y trabayar equí puedan aportar a una vivienda. Estes viviendes son pa ellos”, señaló Sánchez.
El director xeneral añedió que l’apueste por construyir vivienda pública más allá de los grandes núcleos urbanos contribúi a reforzar la capacidá de los conceyos rurales p’afitar población y garantizar que los que desenvuelven nellos la so actividá llaboral puedan tamién construyir ellí’l so proyectu de vida.
