L’asociación Aspace, premiu Ana Casanueva 2019

L'actu d'entrega del galardón va tener llugar esti xueves na Capiya del Edificiu Históricu de la Universidá d'Uviéu

0
70
L'asociación Aspace, Premiu 'Ana Casanueva 2019
El xuráu del premiu, nel hotel Reconquista d'Uviéu.

L’Asociación d’Ayuda a Persones con Paralís Cerebral (Aspace) foi la entidá reconocida col premiu Ana Casanueva 2019, que consiste nun premiu únicu de 50.000 euros. La decisión del xuráu foi comunicada a los medios de comunicación na tarde del vienres nel Hotel de la Reconquista d’Uviéu por Santiago González-Alverú Nieto, quien actuaba como secretariu.

Aspace nació n’Asturies fai más de medio sieglu. Nesti tiempu, convirtióse nun referente nacional na atención ya integración social y educativa de les persones con paralís cerebral. Distinguida cola Medaya de Plata del Principáu en 2016, l’asociación cunta na actualidá con más de 200 asociaos y beneficia directamente a unes 180 persones y a les sos families. Empresta sofitu y acompañamientu a lo llargo de toles etapes de la vida con independencia del nivel d’autonomía de les persones.

L’asociación cunta na actualidá con más de 200 asociaos y beneficia directamente a unes 180 persones

El premiu Ana Casanueva, convocáu pol empresariu y filántropu ástur-mexicanu Carlos
Casanueva Vares y l’Asociación Iberoamericana de la Comunicación (ASICOM) en collaboración cola Universidá d’Uviéu, tien como oxetivu reconocer el trabayu d’organizaciones non gubernamentales, instituciones d’asistencia privada, fundaciones, asociaciones civiles y organismos ensin fines d’arriquecimientu que cunten con una trayectoria de siquier 5 años a partir de la constitución llegal de la organización,
y qu’operen n’Asturies, con un premiu únicu de 50 mil euros p’aquelles que los sos proyectos fueren los más destacaos mientres l’añu 2017 en temes d’impactu social. De manera xeneral, les exes temátiques para otorgar el premiu son: atención y sofitu a población en condiciones de desventaxa, esclusión social o probeza; xeneración d’oportunidaes y accesu a educación y formación; accesu a servicios sociales y de salú; sofitu a migrantes, y trabayu con grupos vulnerables o en riesgu.

L’actu d’entrega del premiu va tener llugar esti xueves. La ceremonia va celebrase de magar les 19:00 hores na Capiya del Edificiu Históricu de la Universidá d’Uviéu.