El Conceyu de Llangréu va habilitar a partir de mañana, xueves 16 d’avientu, de manera gratuita, el pequenu tren turísticu que davezu tresllada dende El Cadavíu hasta La Nueva a los visitantes del Ecomuséu Mineru del Valle de Samuño como mediu de tresporte públicu provisional y alternativu pa les persones de la zona afectaes pol corte de la carretera LA-7. El desplazamientu d’una escombrera por mor de les intenses agües de les últimes selmanes afectó a la vía y obligó a cerrala al tráficu’l pasáu xueves.
La vía del tren mineru, que nun ta afectada pol argayu, dexa una entrada y salida
alternativa al valle y superar la torga na carretera. El ferrocarril va faer cinco trayectos d’ida y vuelta tolos díes sacante los vienres, nos que la frecuencia va aumentar hasta los
nueve servicios pa compaxinalo col so usu turísticu como mediu d’accesu al Ecomuséu.
Los horarios van tar coordinaos colos del tresporte escolar, de manera que l’alumnáu de primaria y secundaria residente na zona nun tenga demorances al camudar de manera de tresporte (tren y autobús) n’El Cadavíu nos sos desplazamientos escontra los centros escolares nin tampoco nel regresu. Los trenes van ser igualmente gratuitos pa los vecinos que los usen pa llegar a otros medios de tresporte públicu n’El Cadavíu. Los horarios completos pueden consultase nes tables axuntes.
Amás, l’accesu piatonal a les estaciones d’El Cadavíu y el pozu San Luis, en La Nueva, va permanecer abiertu les 24 hores del día por que los vecinos puedan xubir o baxar a cuerpu. El pasu solo va tar cortáu mientres los momentos de circulación de los trenes pa evitar
situaciones de peligru y accidentes. Nos accesos piatonales ta virtiéndose sal pa combatir
la formación de xelu coles baxes temperatures y dexar asina un usu seguru.
«Ye un serviciu esencial que’l Conceyu tien qu’emprestar pa dar respuesta a la situación
na que queden los vecinos de La Nueva hasta que los técnicos puedan reparar
definitivamente la carretera, un procesu que va llevar dalgún tiempu. Pero cola adaptación del tren como mediu de tresporte pueden cubrir les necesidaes d’escolarización de los menores, ayudar a quien precisen una forma de llegar al trabayu y dexar qu’otros vecinos puedan baxar a faer compres o xestiones con cierta normalidá», señala l’alcaldesa, Carmen
Arbesú. «D’esta forma, tamién s’eviten los grandes rodios per carreteres secundaries que, cola LA-7 cortada, son necesarios p’aportar a La Nueva».
Nel usu del tren collabora Sadim, la empresa del grupu Hunosa que, al pie de la consultora
Global, xestiona l’Ecomuséu y el tren mineru por un conveniu col Conceyu, titular de les
instalaciones. La so ayuda va dexar caltener abiertu l’aparcamientu de la estación d’El
Cadavíu por que los vecinos de La Nueva puedan dexar los sos coches nél. Tamién se van encargar de tola señalización necesaria.
