L’Ayuntamientu de Xixón ellaboró un plan d’actuación específicu pa la celebración del Día de Tolos los Santos con motivu de la COVID-19. Tratase d’un conxuntu de midíes de prevención desarrollaes por CEGISA que’l so fin ye garantizar la seguranza y evitar aglomeraciones nos cementerios municipales.
D’esi mou, instase a los usuarios a non concentrar les sos visites a los cementerios el día 1 de payares, sinón que faigan les visites de forma escalonada. Pa ello, la llínea 25 de EMTUSA va aumentar la so frecuencia al Cementeriu Municipal de Deva dende’l día 24 d’ochobre y hasta el 2 de payares.
De la mesma manera, nos cementerios con más visitantes, como son Deva, Ciares y Xove, va haber controladores d’accesu los díes 30 y 31 d’ochobre y 1 de payares. La so función sedrá, amás, vixilar l’usu obligatoriu de mázcaru, de xel hidroalcohólicu ya informar de les midíes de distanciamientu social, asina como de les rutes d’entrada y salida que se diseñaron.
En concreto, la entrada al pasiellu principal de les unidaes d’enterramientu del Cementeriu Municipal de Deva va realizase pel centru de la puerta principal y la salida peles puertes auxiliares que tan xunto a la principal. Nel Cementeriu Municipal de Ciares l’accesu tará habilitáu poles puertes 1,2,7 y pola de les persones con movilidá reducida. Nel restu de cementerios, les puertes van dividise con valles pa establecer una ruta d’entrada y otra de salida.
Tocante a los servicios relixosos del Día de Difuntos, van celebrase aquellos que determinen los párrocos d’acuerdu coles autoridaes sanitaries.
Toes estes midíes tan apoyáes pola Asociación de Floreros de España que tuvo presente nun aconceyamientu manteníu nel Ayuntamientu cola Alcaldesa de Xixón, Ana González Rodríguez, el conceyal de Promoción Económica, Empleu y Comerciu Llocal, Santos Tejón, y la Xerente de CEGISA, Mónica García.
