– Les trés alministraciones van coordinase pa velar pol cumplimientu de les restricciones impuestes por cuenta de la crisis sanitaria.
– Ente’l 26 de marzu y el 9 d’abril, les xuntes van tar llimitaes a un máximu de 6 persones n’espacios públicos abiertos y de 4 en zones públiques zarraes.
La conseyera de Cultura, Política Llingüística y Turismu, Berta Piñán, caltuvo esta tarde una xunta cola delegada del Gobiernu, Delia Losa; la presidenta de la Federación Asturiana de Conceyos (FACC), Cecilia Pérez; la viceconseyera de Turismu, Graciela Blanco, y el viceconseyeru d’Infraestructures, Movilidá y Territoriu, Jorge García, cola fin d’abordar la movilidá n’Asturies nos díes de Selmana Santa y prever los posibles problemes que puedan provocase nesos díes festivos.
Un de los asuntos trataos foi’l control, per parte de les fuerces y cuerpos de seguridá del Estáu, del cumplimientu de la normativa en materia de turismu y movilidá, mesmo que la coordinación ente les distintes alministraciones.
N’Asturies, esti añu ta suspendida l’actividá de les empreses y actividaes turístiques d’agospiamientu, d’intermediación, de turismu activu y de guía. Namás los establecimientos acoyíos a los servicios esenciales, que se caltienen zarraos al públicu polo xeneral, pueden dexar la estancia de quien tenga de movese por dalgún de los siguientes motivos:
– Asistencia a centros, servicios y establecimientos sanitarios.
– Cumplimientu d’obligaciones llaborales, profesionales, empresariales, institucionales o llegales.
– Asistencia a centros universitarios, docentes y educativos, incluyíes les escueles d’educación infantil.
– Torna al llugar de residencia habitual o familiar.
– Asistencia y curiáu a mayores, menores, dependientes, persones con discapacidá o persones especialmente vulnerables.
– Desplazamientu a entidaes financieres y de seguros o estaciones de repostaxe en territorios estremeros.
– Actuaciones riquíes o urxentes énte los órganos públicos, xudiciales o notariales.
– Renovaciones de permisos y documentación oficial, mesmo qu’otros trámites alministrativos inaplazables.
– Realización d’exámenes o pruebes oficiales inaplazables.
– Por causa de fuerza mayor o situación de necesidá.
– Cualesquier otra actividá de naturaleza asemeyada, debidamente acreditada.
Per otru llau, el Boletín Oficial del Principáu (Bopa) publicó’l llunes un decretu del presidente del Principáu, Adrián Barbón, qu’adaptaba a la comunidá l’alcuerdu algamáu la selmana pasada nel Conseyu Interterritorial del Sistema Nacional de Salú pa llindar la movilidá y los contactos en Selmana Santa.
La norma, que va tar vixente dende les 00:00 hores del 26 de marzu hasta les 24:00 hores del 9 d’abril, tien por oxetivu amenorgar la interacción social pa contener asina les andaes por coronavirus. El decretu recuerda que’l zarru perimetral de la comunidá va caltenese hasta’l final del estáu d’alarma, previstu pal 9 de mayu, polo que la entrada y salida d’Asturies va siguir acutada nell períodu vacacional.
Tamién va siguir vixente la llimitación de la movilidá nocherniega (el toque de queda), nos mesmos términos qu’agora mesmo, esto ye, dende les 22:00 hasta les 6:00 hores. Amás, les xuntes van llimitase a un máximu de 6 persones n’espacios públicos abiertos y de 4 en zones públiques zarraes. Otramiente, n’espacios privaos, como les cases, namás van poder xuntase los convivientes.
Per otra parte, pa respetar los estragales máximos en relación colos grupos, el Gobiernu asturianu nun va autorizar eventos multitudinarios, masivos o de cualesquier otra índole que favorezan la concentración de persones. De toles maneres, cualquier actu que s’entame nestes feches tendrá de cumplir escrupulosamente toles midíes de seguridá y protección.
El Gobiernu d’Asturies encamienta a la ciudadanía estremar la prudencia y la responsabilidá individual nel períodu de Selmana Santa.
