Javier Fernández y Justo Rodríguez Braga viéronse díes depués de conocese la petición de la Fiscalía de diez años de cárcel pal sindicalista y otros exdirixentes de la UGT. L’expresidente del Gobiernu asturianu y l’ex secretariu xeneral del sindicatu pasiaron pela avenida de la Costa, nel barriu de L’Arena, al tiempu que falaben animadamente. D’ello da testimoniu la semeya qu’ufre XIXÓN AL DÍA de forma esclusiva.
La escena asocedía pocos díes dempués de que’l sindicalista Justo R. Braga supiera que la fiscalía pide diez años de cárcel pa él y otros ex dirixentes de la UGT pol casu nel que ta acusáu de fraude na xestión de sovenciones públiques por más de 1,17 millones d’euros.
Choca que Fernández y Braga falen amistosamente y pasien pela ciudá en metá d’un casu xudicial que perxudicó gravemente a la FSA-PSOE, poniendo en dulda’l papel del executivu de Fernández nel otorgamientu de sovenciones a un sindicatu tan cercanu a los socialistes como ye la UGT. Ha recordase amás que foi’l Gobiernu de Javier Fernández quien personó a l’alministración asturiana como parte perxudicada pol supuestu fraude.
