El Gobiernu d’Asturies yá estudia les ufiertes presentaes poles compañíes Ryanair, Volotea y Vueling pa los distintos llotes del contratu de promoción d’Asturies en mercaos internacionales al traviés de la conectividad aérea. El concursu, que cunta con un presupuestu global de 10,1 millones, repártese en 8 llotes independientes pa una programación de vuelos que va estendese hasta abril de 2026.
El periodu de recepción d’ufiertes cerróse güei a les 11:00 hores y, de siguío, procedióse a l’apertura del primer sobre, l’A, que contien la documentación alministrativa. Una vegada abiertu, comprobóse que los ocho llotes recibieron ufiertes de siquier una aerollínea. Son les siguientes:
- Lote nº 1: Londres. Ufiertes de Ryanair, Volotea y Vueling.
- Lote nº 2: París. Ufiertes de Vueling y Volotea.
- Lote nº 3: Düsseldorf. Ufierta de Ryanair.
- Lote nº 4: Bruselas. Ufierta de Ryanair.
- Lote nº 5: Roma. Ufierta de Ryanair.
- Lote nº 6: Fráncfort, Ámsterdam o Dublín. Ufiertes de Ryanair y Vueling.
- Lote nº 7: Lisboa. Ufiertes de Ryanair y Volotea.
- Lote nº 8: Milán. Ufiertes de Ryanair y Volotea.
Nos próximos díes va siguir col procesu d’evaluación d’ufiertes cola apertura del sobre B, qu’inclúi los criterios de valoración por aciu xuiciu de valor. Una vegada que los técnicos de la Conseyería de Mediu Rural y Cohesión Territorial estudien y valoren tola documentación apurrida, va procedese tamién a abrir el sobre C, que contien los criterios de valoración evaluables de forma automática, pa prosiguir asina col procesu d’axudicación de los distintos llotes. La llicitación realízase al traviés de la sociedá pública de Xestión y Promoción Turística y Cultural del Principáu d’Asturies.
Les aerollínees van tener como plazu máximu pa la puesta en serviciu de les rutes a Londres, París, Düsseldorf, Bruxeles, Roma y un destín a escoyer ente Ámsterdam, Frankfurt y Dublín l’entamu de la próxima temporada de vuelos d’iviernu y, nel casu de les rutes a Lisboa y Milán, l’entamu de la temporada de branu de 2023.
El viceconseyeru d’Infraestructures, Movilidá y Territoriu, Jorge García, destaca la bona acoyida de la llicitación, al recibise ufiertes pa tolos llotes recoyíos na primer fase del programa de recuperación de la conectividad internacional.
Tamién recuerda qu’Asturies apostó por reforzar y desestacionalizar los vuelos nacionales mientres la pandemia, lo que motivó tener los meyores datos de recuperación de pasaxeros de la cornisa cantábrica. Al so xuiciu, agora ye’l momentu d’apostar decididamente pola internacionalización, col fin de siguir creciendo na nueva etapa de reactivación y fin de les restricciones a los viaxes tres la crisis sanitaria. Pa ello, siguen les conversaciones coles principales aerollínees europees de rede col fin de reforzar la conectividad internacional.
