La Conseyería d’Educación va reducir al mínimu les práctiques na empresa pal alumnáu de FP y va dexar realizales de forma telemática. El Boletín Oficial del Principáu (BOPA) publicó esti miércoles les instrucciones complementaries sobre’l módulu de Formación en Centros de Trabayu (FCT) de los ciclos de Formación Profesional (FP). Como rempuesta a la situación escepcional provocada pola crisis sanitaria, autorízase a amenorgar les práctiques llaborales al mínimu esixente. D’esta manera, va pasase a 130 hores na FP básica y 220 pa los ciclos de grau mediu y superior. Amás, va dexar que se realicen de forma telemática.
Nel casu de la FP dual, les hores de práctiques yá cubiertes van poder sumase a les del módulu de FCT, hasta un total de 220. Les instrucciones nueves afecten tanto a los estudios presenciales como a los que se siguen a distancia mientres esti cursu. Esta midida afecta a cuasi 6.000 alumnos. Nos ciclos de grau superior de Formación Profesional, el módulu de FCT y el de proyectu intégrense nunu solu, que va tener una duración de 245 hores. Pela so parte, los ciclos de FP básica y de grau mediu van poder incorporar un módulu nuevu de proyectu que va integrase col de la formación práctica na empresa.
Tamién s’anueln toles autorizaciones del programa Erasmus+ pa esti cursu
Tamién se dexa que tolos ciclos sustituyan la estancia n’empreses por actividaes asociaes al entornu llaboral que puedan realizase de forma non presencial. Otra de les novedaes ye que la evaluación del módulu de FCT nun va riquir necesariamente de la collaboración de la figura del tutor o tutora d’empresa. Asina mesmo, la evaluación d’estes enseñances va quedar recoyida por aciu la calificación de Aptu o Non aptu nel módulu de FCT, ensin que se tenga en cuenta pa calcular la nota media.
Per otra parte, l’alumnáu de ciclos formativos qu’entá nun empecipiara’l módulu de FCT o que tuviera qu’interrumpilu pola crisis sanitaria va poder aplazalu y realizalu el cursu próximu. La resolución d’Educación recueye instrucciones análogues pa les enseñances artístiques y deportives. La norma anula tamién toles autorizaciones del programa Erasmus+ pa esti cursu.
