El conceyu de Xixón vien agasayando y faciendo alcordanza de la figura de Federico González-Fierro Botas dende va bien de tiempu. Con esti premiu a la meyor idea normalizadora queremos venceyar la figura d’esti xesuita, escritor y persona comprometida pa col asturianu dende los valores humanistes que marcaron tola so vida,
cola mocedá a la que tanto quixo y cola que se rellacionó de siguío nos sos años como
enseñante.
Les persones integrantes del xuráu punxeron de manifiestu que “ye un proyectu mui bien
estructuráu y trabayáu y ta plantegáu con rigurosidá y orixinalidá y qu’amás va empobináu de mano a dos tipos de públicu, reciella y persones adultes. Inclúi actividaes y desarrollos específicos y al mesmu tiempu tresversales que permiten que pueda llegar a persones de toles edaes y diferentes públicos (ciudadanía de Xixón, turistes, families), favoreciendo d’esta miente la normalización y visualización de la llingua asturiana”. La profesora y coordinadora del proyeutu es Marián García Rodríguez y el so alumnáu de 4u de la Eso que lu llevó alantre (Nicolás Cuervo, Oumnia Lamamra, Sidi Mohamed Salem, Antonio David Pérez, Jose David Pérez, Gabriel Nycolas Gomes, Noa Martínez, Pablo Melero, Jose Antonio Mendoza, Iker Peón, David Suárez, César Gabriel Benítez, Juan Luis Ovalles, Diego Cueto y Diego Soler.
Ye perimportante la tresmisión xeneracional del asturianu, pa que la mocedá lu use con conocimientu y normalidá y puedan d’esti mou ser protagonistes, reflexonar y implicase nel procesu de normalización llingüística y amás nuna día escoyíu a costa fecha, porque como sabéis el miércoles ye 21 de febreru, y esi día vien celebrandose dende 1999 el Día Internacional de la Llingua materna col oxetivu de promover el multillingüismu y la diversidá cultural.
