Por cuenta de la celebración, el 8 de marzu, del Día Internacional de la Muyer, Llaboral Cinemateca programó la proyección de trés películes dirixíes por muyeres que fueron premiaes en distintos festivales nacionales ya internacionales y que van poder vese los díes 7, 8 y 9 de marzu, a les 19:00 hores, nel Paraninfu de la Llaboral.
La cineasta catalana Mar Coll va visitar Xixón el vienres 7 pa presentar el so esitosu tercer llargometraxe, Salve María, una adaptación del llibru Las madres no de Katixa Agirre premiada en Locarno y con reconocencies nos Premios Gaudí y los Feroz, amás d’alzase colos premios a meyor actriz revelación pa Laura Weissmahr nos Goya y na Seminci de Valladolid.
Nesti intensu y afogadizu thriller, Weissmahr da vida a María, una moza y prometedora escritora y madre primeriza, que s’atopa con un titular respigante: una muyer francesa afogó a los sos ximielgos de 10 meses na bañera. Esti espantible actu apodérase de la imaxinación de María, convirtiéndose nuna obsesión. ¿Por qué lo fixo? A partir d’esi momentu, la pantasma del infanticidiu acúrrese sobre la vida de María como una posibilidá esmolecedora.
El sábadu 8 va poder vese l’últimu pase de Por donde pasa el silencio, la primer película de la realizadora andaluza Sandra Romero, qu’entemez documental y ficción para cuntar la hestoria d’Antonio, qu’una Selmana Santa torna a Écija tres años alloñáu del pueblu. Ellí va realcontrase cola so hermana María y el so hermanu mellizu Javier, gravemente enfermu y que precisa desesperadamente la so ayuda. Antonio va tener que remanar esta situación y enfrentara a una difícil decisión: quedase y ayudar a los suyos o volver a la vida que construyó fora.
Premiada en Sitges, Canadá y Francia, la ópera prima de Ariane Louis-Seize, Vampira humanista busca suicida, un elegante coming of age sobre la congoxa adolescente, cierra esti programa especial el domingu 9 de marzu.
Sasha ye una moza vampira con un grave problema: ye demasiao sensible pa matar. Cuando los sos padres dexen d’alimentala, la so vida cuerre peligru. Por suerte, Sasha conoz a Paul, un adolescente solitariu con enclinos suicides que ta dispuestu a dar la so vida para salvar a la so nueva amiga. Llueu’l so alcuerdu conviértese nuna busca nocherniega para cumplir, primero qu’amaneza, los últimos deseos de Paul.
