L’Archivu Históricu d’Asturies súmase a la celebración del Día Internacional d’Archivos con unes xornaes de puertes abiertes que van dexar al públicu conocer les instalaciones el vienres, día 9, de 15:30 a 20:30 hores, y el sábadu, día 10, de 10:00 a 14:00 hores. Esos mesmos díes realizarán visites guiaes p’amosar el trabayu que se desenvuelve na institución y los fondos qu’alluga.
El públicu que deseye participar nes visites guiaes tien de realizar reserva telefónica llamando al 985 225 769. El vienres, les visites van programase a les 17:00 y a les 19:00 hores, mientres que’l sábadu va haber un pase a les 12:00 hores.
El públicu va poder esfrutar, amás, de l’amuesa Asturies nos sos documentos, qu’alluga l’equipamientu nestos momentos y que retrata l’aportar social, políticu y económicu al traviés de distintos documentos y testimonios, como los referíos a la evolución de les grandes empreses d’orixe asturianu.
L’Archivu Históricu d’Asturies, que tien la so see nel edificiu de l’antigua cárcel provincial d’Uviéu dende 2010, conserva más de 180 fondos, tanto públicos como privaos, que tán a disposición de la ciudadanía. Ente otros fines, busca promover l’arriquecimientu del patrimoniu y fomentar la investigación y la cultura, con especial referencia a les sos manifestaciones autonómiques. Tamién tien ente les sos funciones les d’axuntar, caltener, entamar y espublizar la documentación de les instituciones antecesores de la comunidá y la documentación con valor históricu producida pola Alministración autonómica y los sos organismos dependientes.
