Los alcaldes de la Comarca la Sidra celebren l’añu con un brinde virtual

El clásicu brinde nadaliegu de los alcaldes de la Comarca de la Sidra nun podía faltar, pero anguaño, de forma virtual. Los seis alcaldes de Bimenes, Cabranes, Colunga, Nava, Sariegu y Villaviciosa diéronse cita güei a les 12 la mañana de forma dixital pa felicitar l’añu nuevu a toos.

Mensaxes d’ánimu, solidaridá, alcordances de los que nun tán y optimismu enforma ya ilusión de cara al 2021 fueron treslladaos a los asturianos con un firme deséu: la fin del andanciu, la recuperación social y económica y sobremanera muncha salú pa toos.

Pal brinde, como nun podía ser d’otra forma, apostaron pola DOP Sidra d’Asturies, productu con garantía calidable y ellaborao con mazana 100% asturiana.