La primer fase de participación pa redactar el testu constata la preocupación pol medio rural y la necesidá d’una nueva llexislación.
La Conseyería de Mediu Rural y Cohesión Territorial va empecipiar esti mes una consulta a los 78 conceyos asturianos pa recoyer les sos aportaciones ya incorporales al anteproyectu de Llei d’Ordenación Integral del Territoriu d’Asturies (Loita).
El documentu aborda seis bloques temáticos: ordenación del territoriu, planiamientu urbanísticu, clasificación del suelu, suelu urbanizable y núcleos rurales, actuaciones de tramitación urbanística y vivienda protexida. Preséntase en forma d’encuesta pa facilitar la participación y va tar disponible hasta setiembre, cuando se va axuntar tola información. Amás, la consulta va ampliase a más colectivos, como colexos profesionales, axentes económicos y asociaciones.
“Nos últimos meses caltuvimos distintes xuntes con alcaldes y alcaldeses de los distintos conceyos y treslladáronnos, como pidimientu, una consulta na que puedan responder, sobre la base de la so esperiencia nel territoriu, a cuestiones concretes d’interés pa la nueva llei del suelu”, esplicó la directora xeneral d’Ordenación del Territoriu y Urbanismu, Sonia Puente Landázuri. “Tomemos nota y punximos en marcha una encuesta pa dar respuesta a esti pidimientu de los conceyos pa la redacción d’una llei que queremos que seya lo más participada posible”, añedió.
Per otra parte, esti mes concluyó’l procesu de consulta pública previa al traviés del portal Asturies Participa, que recoyó les preocupaciones de distintos colectivos y de la ciudadanía en xeneral. La directora destacó ente les aportaciones recibíes la preocupación pol mediu rural y la necesidá d’una lexislación nueva. Participaron ciudadanos particulares, asociaciones empresariales, colexos profesionales, sindicatos y grupos políticos, ente otros colectivos.
L’equipu redactor de la llei, nel marcu d’un conveniu del Gobiernu d’Asturies cola Universidá d’Uviéu, va esaminar agora toles aportaciones. Tamién va estudiar les realizaes pola mesa de conocencia tresversal, integrada por espertos de distintos ámbitos, pa incorporar la información reunida a la redacción de la nueva normativa.
