Los Díes Europeos de l’Artesanía van llevar anguaño los sos talleres, esposiciones y alcuentros singulares a 33 conceyos asturianos, trelce más que na edición de 2024. Asina lo destacó Julio Zapico, director xeneral de Comerciu.
Volverá celebrase baxo’l lema Esencia Artesana del 21 de marzu al 6 d’abril. Ente les novedaes, prevense actividaes en trece nuevos conceyos: Samartín del Rei Aurelio; Noreña; Tinéu; Siero; Peñamellera Baxa; Villayón; Cuaña; Navia; Caravia; Ribeseya; Taramundi; Cangas y Mieres.
Esencia Artesana ye un eventu de calter festivu y divulgativu col que pretende promovese y averar l’artesanía asturiano al conxuntu de la ciudadanía por aciu’l desenvolvimientu de distintes actividaes, toes de calter gratuitu. Anguaño tamién se va ampliar notablemente’l programa, que va incluyir 134 talleres participativos d’oficios artesanos, demostraciones y trés esposiciones de pieces artesanes. Coles mesmes van desenvolvese una ventena d’alcuentros n’espacios y edificios singulares, cola incorporación del Pozu Sotón, la Cueva de Tito Bustillo y el Real Sitiu de Cuadonga, ente otros. Los Díes Europeos de l’Artesanía van involucrar a 30 profesionales de distintos oficios.
Tocantes a los talleres, van habilitase places pa más de 1.300 persones y va incidise en trés llinies de trabayu: acútense 300 places pa persones migrantes coles mires de facilitar el so acercamientu a la cultura asturiana; prevense actividaes en seis centros de sofitu a la integración, y van realizase talleres d’emprendimientu en cinco conceyos pa evaluar les posibilidaes d’impulsar el relevu xeneracional y promover la creación d’empléu nel sector.
