El Gobiernu d’Asturies invirtió 174.906 euros na recuperación y puesta en valor cultural y paisaxística de les brañes de La Pornacal, Arbellales, Saliencia y Endriga, pertenecientes a la Reserva de la Biosfera de Somiedu. Les actuaciones, executaes pol conceyu, financiáronse con fondos Next Generation, al traviés de la convocatoria d’ayudes a conceyos que cunten con reserves de la biosfera.
Los 100.000 euros destinaos a la braña de La Pornacal dexaron ameyorar los aparcamientos de la sienda PR-AS-14 en Vil.lar de Vildas y facilitar l’accesu de les persones con movilidá amenorgada. Tamién s’habilitó conexón wifi en distintos puntos, dientro de los itinerarios turísticos más transitaos.
Nel ámbitu del caltenimientu natural realizóse una roza nes zones de braña pa caltener los praos de siega, que son hábitats prioritarios na Estratexa de Biodiversidá de la Unión Europea. Tamién s’impermiabilizaron les bebezones d’esta braña pa facilitar que los anfibios y el ganáu puedan aportar a ellos, ya instalóse un sistema de filtración que torga que la falcatrúa ibérica (un pequenu mamíferu de la familia de los topos) entre nes tuberíes de riegu, onde cuerre’l peligru d’afogase.
Nes brañes de Arbellales, Saliencia y Endriga invirtiéronse en xunto casi 75.000 euros, que dexaron recuperar el camín de Guérgola y les siendes Saliencia-La Pradería y Endriga-Saliencia. Nes trés brañes realizáronse actuaciones de dixitalización pa facilitar la conexón a internet de los usuarios, qu’amás van dexar recoyer información y establecer indicadores sobre la capacidá d’acoyida de los distintos espacios.
