Los hoteles asturianos agospiaron n’ochobre a 159.299 turistes que xeneraron 323.604 pernoctaciones, según los datos publicaos güei pol Institutu Nacional d’Estadística (INE). Trátase de les cifres más altes de los rexistros históricos pa esti mes, que representen medríes del 8,31 % y del 7,79 %, respectivamente, al respective del mesmu periodu del 2019. Amás, si se garren como referencia los datos d’ochobre del 2020, los porcentaxes de xubida algamen el 151,75 % y el 166,41 %,
D’esta miente, Asturies foi la única comunidá autónoma en superar el númberu de turistes rexistraos nel últimu mes d’ochobre previu a la pandemia.
Destaquen sobre manera los rexistros de los hoteles allugaos en conceyos de menos de cien mil habitantes, con 84.224 turistes y 169.984 pernoctaciones n’ochobre, lo que supón medríes del 20,86 % y del 15,03 %, respectivamente, al respective del mesmu mes del 2019.
Pela so parte, el turismu internacional sigue amosando síntomes de recuperación y representa’l 14,5 % de visitantes y el 13,8 % de les estancies. En términos absolutos, agospiaron n’establecimientos hoteleros 23.024 viaxeros estranxeros que xeneraron 44.522 pernoctaciones.
No que fai al acumuláu del añu, los hoteles sumen 1.102.528 turistes y 2.476.940 estancies, cifres qu’impliquen medríes del 34,5 % y del 37,7 %, respectivamente, sobre’l 2020.
El númberu de persones emplegaes nos hoteles asturianos n’ochobre xubió a 2.594, un 38,5 % más que nel mesmu mes del añu pasáu.
