La Conseyería de Salú concedió 825.000 euros pal desenvolvimientu de planes y programes municipales de promoción de la salú y bienestar de la ciudadanía. Un total de 40 conceyos y cuatro mancomunidaes van beneficiase d’estes subvenciones, que fomenten iniciatives de calter comuñal. Salú aumentó en 25.000 euros el presupuestu destináu a la convocatoria d’anguaño, que tamién amplía los criterios de valoración y les árees d’actuación col fin de fortalecer la salú de la población.
La promoción de la salú ye’l procesu que dexa a les persones amontar el control sobre la so situación p’ameyorala, polo que non solo toma acciones empobinaes directamente a aumentar habilidaes y capacidaes, sinón tamién les empobinaes a modificar les condiciones sociales, ambientales, económiques, llaborales, xeográfiques, culturales y educatives que tienen impactu nos determinantes de salú. El Plan de Salú del Principáu reflexa que la salú y el bienestar han encetase dende un puntu de vista individual, pero tamién, y sobremanera, colectivu.
Les actividaes que les entidaes locales promueven nesti ámbitu xeneren empleos directos y tamién repercuten n’organizaciones non gubernamentales, asociaciones ensin ánimu d’arriquecimientu y empreses del tercer sector empobinaes escontra’l bienestar de la comunidá.
