La conseyera de Presidencia, Rita Camblor, presentó güei en Llangréu’l proyectu de presupuestos del so departamentu pa 2023, que xube un 24,7%, hasta algamar los 290.371.557 euros, la cantidá más elevada d’esta llexislatura. Les cuentes incluyen 7,4 millones destinaos a dos proyectos fundamentales pa esti conceyu: 5 millones pa rematar les obres del Palaciu de Xusticia, el principal equipamientu xudicial en marcha n’Asturies, y 2,4 pa la recuperación de los antiguos Talleres del Conde.

El sofitu a los conceyos, la modernización de l’Alministración y el compromisu cola mocedá son dalgunes de les llinies maestres del presupuestu. Nesti apartáu, l’aumentu algama’l 71,45%, hasta llegar a los 100.331.747 euros, pa favorecer el desenvolvimientu económicu y social al traviés del usu de les nueves tecnoloxíes y la ufierta de servicios públicos dixitales a la sociedá.

Tamién crecen en 370.000 euros los fondos destinaos a emigración (26,6% más), memoria democrática (41%), mocedá (20,39%), polítiques de sofitu al colectivu LGTBI (20%), cooperación al desenvolvimientu (6,25%) y participación ciudadana y atención a la ciudadanía (6,13%). Pela so parte, les inversiones del Serviciu d’Emerxencies del Principáu (Sepa) xuben un 27,5%.

Nel ámbitu de la xusticia, el palaciu de Llangréu supon la mayor inversión prevista pa 2023 en sedes xudiciales, qu’en total suman 6.697.000 euros. El restu de les partíes van destinar a reformes nel Tribunal Superior de Xusticia (295.000 euros) y nel Palaciu de Xusticia d’Uviéu (305.000 euros), a la rehabilitación de los xulgaos de Cangas (100.000 euros), la nueva see xudicial de Pravia (100.000 euros), la reorganización d’espacios en Mieres (90.000 euros) y la meyora de l’accesibilidá en Siero (55.000 euros).

Les cuentes de Presidencia incluyen 100.000 euros pa empecipiar el proyectu d’unificación de les sedes xudiciales n’Uviéu, concretamente na zona de Llamaquique. Esti compromisu cunta con más respaldu presupuestariu, distribuyíu ente delles conseyeríes.

Amás, el proyectu recueye una medría de 2,6 millones pa crear 17 nueves places que van dexar emprestar un serviciu más axilosu y eficiente a la ciudadanía. Con esti criteriu, créanse dos places pa la Fiscalía, xuna pal Institutu de Medicina Llegal, ocho pal nuevu xulgáu d’Uviéu y otra pal xulgáu de menores. Amás créanse trés places de psicólogos, una de trabayu social y un xestor pa los equipos psicosociales y l’oficina d’asistencia a les víctimes d’Avilés.

El presupuestu va dexar siguir avanzando escontra la xusticia electrónica. Asina, tres la implantación del espediente xudicial y fiscal electrónicu, en 2023 van incorporase meyores como xuna ferramienta de dictáu xurídicu, va acometese la digitalización de los llibros del Rexistru Civil y van instalase sistemes de videoconferencia nos 60 xulgaos de paz.

Les cuentes incorporen, coles mesmes, les partíes necesaries pa executar ocho iniciatives con cargu a los fondos mineros. Ente elles, destaca la recuperación de los Talleres del Conde, que xube a 3,2 millones. Como en tolos proyectos d’esti tipu, l’Institutu pa la Transición Xusta apurre’l 75% y el Principáu, el 25% restante.