Alredor de 8.500 emplegaos del Principáu tán convocaos a les elecciones sindicales na Alministración autonómica que se van celebrar el xueves, día 30 de payares, en distintes sedes repartíes pola comunidá. La plantiya va escoyer a 173 representantes sindicales, ente los que destaquen los 29 integrantes de la Xunta de Personal Funcionariu y los comités d’empresa de les conseyeríes d’Educación y de Derechos Sociales y Bienestar, con 23 miembros cada unu.
Los comicios van anovar los órganos de representación de tolos emplegaos públicos, sacante los estatutarios y llaborales del Serviciu de Salú (Sespa), el personal docente y dellos organismos y entes, como los Establecimientos Residenciales d’Asturies (ERA), el Serviciu Públicu d’Empléu (Sepepa) o la Orquesta Sinfónica del Principáu (OSPA).
Les votaciones desenvolveránse’l xueves ente les 8:30 y les 19:00 hores en distintes sedes alministratives (Uviéu, Xixón, Avilés, Llangréu, Mieres del Camín, Navia, Cangues d’Onís y Cangas del Narcea). L’acta global va ellaborase’l vienres, 1 d’avientu.
Tres la conclusión d’estos procedimientos electorales, va rematar la elección más numberosa de representantes dientro del ámbitu de les conseyeríes, organismos y entes públicos del Principáu.
