Los primeros diez nuevos trenes pa la rede de cercaníes que van llegar a Asturies en 2026 van empezar a construyise esti mes, concretamente’l día 26, según anunció güei’l ministru de Tresportes y Movilidá Sostenible, Óscar Puente, tres la so xunta col presidente d’Asturies, Adrián Barbón.
Mientres el so alcuentru n’Uviéu, analizaron la evolución del plan de cercaníes que ta en marcha y que cunta con una dotación de 1.586 millones p’anovar por completu la infraestructura y los convóis. Hasta agora movilizóse’l 67% del presupuestu y el grau d’execución algama’l 30%. En total, la comunidá va cuntar con 35 nuevos trenes nos que se van invertir más de 300 millones.
“Tán cumpliéndose los plazos. Somos una comunidá esixente, pero reconocemos la bona voluntá y la vocación de cumplir con Asturies del Ministeriu de Tresportes y Movilidá Sostenible”, valoró Adrián Barbón, quien tamién llogró’l compromisu d’Óscar Puente de rebaxar les tarifes del peaxe del Güerna “dende’l primer viaxe”.
La programación y los horarios de l’alta velocidá ferroviaria son otros dos de los asuntos que se trataron esta mañana na see de Presidencia. Los planes del ministeriu pasen por doblar les places ente Asturies y Madrid, al aumentar dende les 820.000 actuales a casi dos millones añales, y por rebaxar en 15 minutos los tiempos de viaxe.
A falta de cerrar los horarios definitivos, va poner en marcha un Alvia de frecuencia diaria con llegada a Avilés y va estrenase el serviciu de baxu costu Avlo con un percorríu diariu que va parar en L.lena, Mieres, Uviéu y Xixón. En total, va haber seis frecuencies diaries que van partir d’Uviéu y cinco dende Xixón.
Amás, unu de los AVE va salir de Xixón a primer hora de la mañana, concretamente a les 6:26, pa impulsar los viaxes de negocios y facilitar que puedan realizase xestiones na capital mientres tola xornada.
Per otra parte, los nuevos trenes AVE van entrar en funcionamientu primero que remate’l primer trimestre d’anguaño, según garantizó’l ministru Puente. Dende la puesta en marcha de la variante de Payares, el pasáu 29 de payares, yá se vendieron cerca de 200.000 billetes d’alta velocidá.
