Luis Enrique torna a la Selección

"Comprometíme a que nel momentu que se sintiera con fuerces para volver tuviera les puertes abiertes", anunció Rubiales

0
756
Luis Enrique dexa la Selección Española
Luis Enrique. / RFEF

Luis Enrique torna a la Selección Española cinco meses depués de dexala. Asina lo comunicó esti martes el presidente de la Federación Española de Fútbol (RFEF), Luis Rubiales, nuna llarga rueda de prensa. «Luis Enrique torna al so puestu de trabayu. Comprometíme a que nel momentu que se sintiera con fuerces para volver tuviera les puertes abiertes», anunció.

El regresu del técnicu xixonés supón la destitución de Robert Moreno, el so sustitutu nel banquín del conxuntu nacional. «Luis Enrique tuvo que abadonar na peor situación que-y toca vivir a un padre. Robert trabayó perbién, pero’l líder d’esti proyectu ye Luis Enrique». Rubiales insistió en que, nel momentu d’asumir el cargu, Moreno yera consciente de que la Federación tenía les puertes abiertes al xixonés.

Luis Enrique dexó’l so puestu como seleccionador nacional en xunu por «motivos que me torguen desenvolver con normalidá les mios funciones dende marzu». Nun comunicáu, El xixonés agradeció’l «enfotu y comprensión» de los responsables de la federación y la «profesionalidá» de «toles persones que formen parte del staff y los xugadores«.