L’usu del tresporte públicu sigue creciendo n’Asturies. Los datos del Consorciu de Tresportes d’Asturies (CTA) reflexen qu’ente xineru y mayu realizáronse 25.493.957 viaxes, un 6% más que nel mesmu periodu del añu pasáu. Solo en mayu contabilizáronse 5.228.676 desplazamientos, lo que supón una medría del 4,5% respectu al mesmu mes del 2025 y confirma l’enclín al alza del tresporte públicu na comunidá.
Nesta meyora, CONECTA, el billete únicu asturianu, consolídase como la pieza central del sistema. Ocho de cada diez viaxes en tresporte públicu per carretera validáronse yá cola tarxeta del CTA. Hasta mayu, casi 20,7 millones de trayectos abonáronse al traviés d’esti soporte, lo que confirma la so implantación creciente ente la ciudadanía.
La plataforma del CTA sigue, amás, ampliando la so base d’usuarios y algama yá los 457.507 titulares. A esti crecedera súmase la incorporación progresiva de nueves funcionalidades pa facilitar l’accesu al serviciu. Ente elles, destaca la posibilidá d’acutar taxi al traviés de l’aplicación, una prestación qu’esta mesma selmana empezó a funcionar n’Avilés.
El Gobiernu d’Asturies caltién el so apueste por un sistema de tresporte públicu per carretera más competitivu, cómodu y fiable. Nesi marcu, el CTA sigue incorporando nuevos servicios y refuerzos naquelles rutes con mayor demanda o nes que resulta necesariu ameyorar la cobertoria horaria en determinaes franxes del día. Tamién se trabaya pa reforzar la conexón con nodos estratéxicos, como los complexos sanitarios.
L’Executivu autonómicu considera la movilidá y el tresporte públicu ferramientes esenciales pa vertebrar social y territorialmente Asturies, al contribuyir a una rede de comunicaciones más accesible, útil y adaptada a les necesidaes de la población.
