La viceconseyera de Turismu destaca que’l Gobiernu autonómicu ta decidíu a que la gastronomía rexonal “algame’l nivel de reconocencia que merez”.
La viceconseyera de Turismu, Graciela Blanco, clausuró güei la participación d’Asturies na edición última de Madrid Fusión, na que’l Principáu presentóse pela primer vegada con un estand esclusivu pa proyectar el potencial de la gastronomía nel turismu asturianu.
Nel Espaciu Gastronómicu Asturies Paraísu Natural y Alimentos del Paraísu, Blanco destacó’l protagonismu de los productos y profesionales asturianos. Si la xornada del llunes tuvo al cargu de les Estrelles Michelin, y na d’ayeri’l protagonismu foi pal Club de Guisanderes d’Asturies, güei foi la vez d’una representación de valores nuevos de la cocina asturiana: Xune Andrade, del Restorán Monte, y Javier Álvarez Farpón, de Casa Farpón, acompañaos pol reposteru Jonathan González, de Pastelería Cabo Busto. Primeramente, el recintu asturianu acoyó una cata-degustación de los quesos de les DOP Afuega’l Pitu, Gamonéu, Casín y Cabrales.
Al igual qu’en xornaes precedentes, l’estand completó güei tol so aforu nes demostraciones y les cates.
Graciela Blanco sorrayó que la participación de la comunidá nesta cita internacional de la gastronomía ye “una demostración evidente de qu’Asturies concita más interés que nunca”. “El Gobiernu del Principáu ta decidíu a que la nuestra gastronomía algame’l nivel de reconocencia que merez”, añedió. Nesti sentíu, tamién destacó l’impulsu que ta suponiendo’l Plan de Posicionamientu Gastronómicu, presentáu apocayá en Fitur.
