Una persona resultó mancada tres salise de la vía col vehículu que conducía y cayer al ríu, dende aprosimao unos cuatro metros, cuando circulaba pola AS-17, ente les localidaes de Foz y Pendones, nel conceyu de Casu.
L’home, de 77 años, foi atendíu nel llugar del accidente pol mélicu-rescatador del Grupu de Rescate y treslladáu darréu al Hospital Universitariu Central d’Asturies (HUCA) nel helicópteru medicalizáu de Bomberos d’Asturies. Por cuenta de más pruebes y hasta nueva valoración médica presentaba politrauma de pronósticu reserváu.
El mancáu tuvo que ser escarceláu del interior del vehículu por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Samartín del Rei Aurelio en coordinación col Grupu de Rescate y Guardia Civil de Tráficu.
N’asegurando’l vehículu con unes cuerdes abrióse buecu pa qu’aportara hasta’l mancáu’l mélicu-rescatador. Mientres la operación caltener al home enriba del nivel de l’agua y trabayóse con estremada precuru colos equipos d’escarcelación por que nun entraren en contactu col ríu. Una vegada que s’ablayó’l techu treslladóse al mancáu cola tabla de rescate, inmovilizáu, hasta l’aeronave que la treslladó al hospital.
