La esposición «Xixón. Epicentro Fotografia, 1858-1992» superó la pasada fin de selmana la cifra de cincuenta mil visitantes. Dende la so apertura al públicu, el 29 de marzu, y hasta ayeri, miércoles 10 de setiembre, entraron nel Palaciu de Revillaxixéu 51.183 persones. Ye, ensin dulda, una de les esposiciones temporales más vistes d’Asturies no que llevamos de sieglu XXI. Esta arribación de públicu demuestra l’interés y l’atracción qu’espierta la fotografía como fonte imprescindible pa la conocencia de la hestoria contemporanea. L’interés pola esposición toma a tolos ámbitos sociales de Xixón, que se vieron reflexaos nes distintes estayes de l’amuesa: la sablera, la industria, el puertu, el ferrocarril y el tranvía, la semeya, la tarxeta postal, les cais, places y barrios de la ciudá, la redolada rural, el fotoperiodismu, etc. A lo último, ye una esposición que foi recibida con sorpresa, prestu, interés y arguyu per parte de los xixoneses, que son mui conscientes del valor que tien la fotografía pa caltener la so memoria y de que tolo que s’espón nella ye patrimoniu municipal.
Tamién los foresteros y turistes supieron ver l’interés de la esposición, ya que nella apréciase en tola so dimensión la hestoria universal de la fotografía: técniques, soportes, cámares, tarxeta postal, fotografía artística, etc. Amás, la esposición sirvió p’animar a persones y families a donar fotografíes de Xixón al Muséu del Pueblu d’Asturies, o a dexar imaxes, colo que s’aumentó considerablemente’l patrimoniu fotográficu de la ciudá.
La esposición va cerrar el domingu 28 de setiembre de 2025. Hasta esi día van siguir les visites guiaes gratuites tolos domingos a les 12:30 hores. Coles mesmes, el vienres 26 de setiembre, por cuenta de la Nueche Blanca, van realizase dos visites guiaes nocherniegues a les 19 hores y 21 hores.
