Más de 51.500 llares asturianos pueden solicitar yá la so reconocencia como familia monoparental, con tolos derechos que va traer. La gran mayoría d’estes families unes 42.000- tán encabezaes por muyeres. L’Executivu aprobara’l decretu correspondiente en marzu. Agora, cola so entrada a valir –fechu qu’asocedió esta mesma selmana- yá puede tramitase la solicitú énte la Conseyería de Derechos Sociales y Bienestar.
La nueva norma define como familia monoparental la formada por un proxenitor y les persones venceyaes por filiación, adopción, tutela o acoyimientu permanente o delegación de guarda con fines d’adopción.
Una vegada qu’estos llares llogren la reconocencia, van poder aportar a beneficios y ayudes que promuevan les alministraciones pa esti tipu de families. Estes ventayes nun dependen d’un solu departamentu –la Conseyería de Derechos Sociales y Bienestar, nesti casu-, sinón de toles alministraciones que decidan aplicar midíes favorables a les families monoparentales. Tal como asocede nel casu de les families numberoses, la reconocencia de familia monoparental ye la condición necesaria pa beneficiase de tales ayudes.
El decretu estrema ente families monoparentales de categoría xeneral y especial. Van considerase de categoría xeneral toes, sacante les que se numberen de siguío, que van tener la condición d’especiales:
– Aquelles con dos o más fíos o menores a cargu per acoyimientu o guarda p’adopción.
– Aquelles nes que dalgún de los sos miembros tenga reconocíu un grau de discapacidá cimera al 33%.
– Aquelles nes qu’unu de los proxenitores tenga reconocíu un grau 3 de dependencia, fuera declaráu en situación de la incapacidá permanente absoluta o gran invalidez.
– Aquelles nes que la persona qu’encabeza la unidá familiar seya muyer víctima de violencia de xéneru.
