Les xornaes recuperen anguaño la presencialidá y van desenvolvese ente’l 14 y el 16 de febreru nel Palaciu d’Esposiciones y Congresos Ciudá d’Uviéu
L’alumnáu va recibir información, de primera mano, de los 18 centros, tanto propios como adscritos, nos que s’imparten les distintes titulaciones de la institución universitaria.
Docentes, egresados y estudiantáu de los últimos cursos de distintos graos de la universidá asturiana van asesorar al alumnáu de Bachilleratu, FP y ESO pa ayudar na elección d’estudios.
Un total de 7627 estudiantes de 90 centros educativos d’Asturies van participar nes Xornaes d’Orientación Universitaria qu’anguaño recuperen la presencialidá y van desenvolvese ente’l 14 y el 16 de febreru nel Palaciu d’Esposición y Congreso Ciudá d’Uviéu. Estes xornaes, entamaes pola Universidá d’Uviéu, tienen por oxetu informar a alumnáu d’Educación Secundaria Obligatoria, Bachilleratu y Formación Profesional sobro la ufierta formativa qu’imparte la institución académica asturiana d’enseñanza superior.
L’alumnáu qu’allegue hasta’l palaciu de congresos va recibir información, de primera mano, de los 18 centros, tanto propios como adscritos, de la Universidá d’Uviéu nos que s’imparten les distintes titulaciones que formen parte de la ufierta formativa de la institución. Les xornaes cunten tamién cola participación de cinco servicios universitarios. Son el Centru d’Orientación ya Información al Estudiante (COIE), la Oficina d’Atención a Persones con Necesidaes Especiales (ONEO), los colexos mayores y residencies, el Serviciu de Deportes y La Casa de les Llingües.
Alfonso López Muñiz, vicerrector d’Estudiantes, esplicó esta mañana que les xornaes son una escelente oportunidá p’ayudar a los estudiantes a resolver duldes nun pasu tan importante nes sos vides como la elección de los estudios que deseyen cursar. “La ufierta formativa ye tan amplia que ye normal que l’alumnáu dulde sobro qué carrera escoyer. La nuesa misión como institución pública ye emponer al estudiantáu, apurriendo tola información que tenemos, pa facilitar la so elección”, comentó.
Pa entainar l’atención al alumnáu, el Vicerrectorado d’Estudiantes ellaboró un ampliu programa que se va desenvolver mientres trés díes, nos que los 18 centros y servicios universitarios, van poder ufiertar el so asesoramientu al estudiantáu de Bachilleratu, los ciclos formativos de grau cimeru de la Formación Profesional y cuarto cursu de la Educación Secundaria Obligatoria. El vicerrectorado alvierte de que solo los centros yá inscritos van poder asistir a esti alcuentru.
Alumnáu participante:
El total d’estudiantes inscritos per centros y díes ye’l siguiente:
Total d’alumnáu asistente: 7.627
Día 14: 2904 de Bachilleratu y Formación Profesional.
Día 15: 2966 de Bachilleratu y Formación Profesional.
Día 16: 1757 de cuartu cursu d’Educación Secundaria Obligatoria.
Resume de la programación
Los díes 14, y 15, pela mañana, les actividaes van dir dirixíes al alumnáu de Bachilleratu y Formación Profesional. Les sesiones de les tardes van tar abiertes pal estudiantáu y les sos families.
Amás, el día 15, pela tarde, la charra informativa va tar empuesta a padres y tutores.
A lo último, el día 16, n’horariu de mañana, les actividaes, tanto les charres informatives como les visites a estands, van dedicar al alumnáu de cuartu cursu d’Educación Secundaria Obligatoria.
Facultaes y escueles collaboradores
Les charres van ser impartíes por 18 facultaes y escueles. Van Participar 80 docentes el día 14 de febreru; 88, el 15; y 40, el 16 de febreru. Tamién van asesorar al alumnáu d’enseñances medies egresados y estudiantes de los últimos cursos de los distintos graos que s’imparten na universidá asturiana. Van Ser, en concretu, 73 estudiantes el 14; 70 alumnos, el día 15, y 70 más l’últimu día, el 16 de febreru.
