May avisa: la cuarta votación del Brexit va ser la última

El Parllamentu británicu tornará a pronunciase sobre l'alcuerdu pa una salida pactada de la Xunión Europea na primer selmana de xunu

0
623

Nun va haber más oportunidaes. El Parllamentu británicu tornará a pronunciase na primer selmana de xunu sobre’l ‘brexit’. Va ser la cuarta ocasión na que l’alcuerdu algamáu ente’l Gobiernu de Theresa May y la Xunión Europea (XE) pa una salida negociada del Reinu Xuníu de la zona comunitaria llegue a la Cámara de los Comunes. «Ye imperativu que lo faigamos si’l país va abandonar la XE enantes del recesu parllamentariu de branu», esplicó la primer ministra en declaraciones recoyíes por Europa Press.

La primer ministra del país nun ta dispuesta a siguir aldericando sobre esti alcuerdu que la XE nun ta dispuesta a modificar. La salida del Reinu Xuníu de la Xunión Europea foi aprobada polos ciudadanos británicos en referéndum en xunu de 2016. Fontes del Gobiernu británicu citaes pola BBC apunten a qu’un nuevu ‘non’ al alcuerdu podría suponer un divorciu de sopitu o la paralización del procesu.

Los británicos tan llamaos a les urnes el prósimu xueves 23 de mayu. Los ciudadanos del país deberán escoyer a los sos representantes nes instituciones europees, anque’l Gobiernu de May confía en que los eurodiputaos británicos nun lleguen a tomar posesión de los sos escaños.