L’usu de mázcares ye obligatoriu dende esti martes nes víes públiques. El Boletín Oficial del Principáu d’Asturies (BOPA) espublizó ayeri la modificación la resolución qu’establez l’usu obligatoriu del mázcaru nes víes públiques con independencia de que pueda caltenese la distancia de seguranza. La midida, aprobada en Conseyu de Gobiernu, ye d’aplicación inmediata como protección frente a la COVID-19.

La resolución caltien la obligatoriedá del usu de mázcares n’espacios al aire llibre y en cualquier espaciu zarráu d’usu públicu siempres que nun resulte posible garantizar la distancia de seguridá de 1,5 metros. Amesta amás la so obligatoriedá nes víes públiques de los núcleos urbanos y nes zones rurales cuando asina lo determinen les autoridaes. Tamién va siguir siendo necesaria’l so usu nel tresporte públicu.

Onde nun va ser necesariu’l so usu ye en sableres y piscines, al tratase d’espacios al aire llibre, siempres que pueda caltenese la distancia mínima de seguranza de 1,5 metros. Pela so parte, les persones con afecciones respiratories tarán exentes y nun van precisar un xustificante médicu. Nel so casu, valdrá con una declaración responsable. L’oxetivu ye evitar la saturación del sistema sanitariu.

Lo que sí s’introduz la resolución ye un encamientu d’atayar o retardar cualquier actividá que nun sía considerada fundamental. Amenórgase l’aforu en xuntes familiares a 50 persones n’espacios al aire llibre y de 25 n’espacios zarraos. Estes llimitaciones nun se van aplicar nel casu de persones convivientes. En cines, teatros y auditorios les butaques preasignaes van poder ser individuales o en grupos de 2 a 4 persones siempres y cuando los miembros de dichu grupu sían convivientes.