El Boletín Oficial del Estáu (BOE) publica esti miércoles la Orde que regula l’usu obligatoriu de mázcara sanitaria cuando nun sía posible caltener la distancia interpersonal de dos metros. Tendrán de llevala tolos mayores de 6 años cuando se dea esa circunstancia na vía pública, n’espacios al aire llibre y en cualquier espaciu zarráu d’usu públicu o abiertu al públicu. La Orde señala que ye tamién recomendable pa los neños d’ente 3 y 5 años. Preferentemente tendrán d’usase mázcares hixéniques y quirúrxiques, que cubran ñariz y boca.
Nun va ser riquir el so usu nes persones que presenten dalgún tipu de dificultá respiratoria, les que tengan motivos de salú xustificaos o aquelles con discapacidá o dependencia que presenten alteraciones de conducta que la faigan invidable. Amás, el testu indica que nun va ser obligatoriu’l desenvolvimientu d’actividaes nes que resulte incompatible’l so usu o si esiste una causa de fuerza mayor o situación de necesidá. Tampoco va ser obligatoriu’l so usu cuando se consuman alimentos y bébores.
