La Conseyería de Mediu Rural y Cohesión Territorial empecipió güei el dragáu pa caltener el caláu del puertu de Candás. Les obres, que’l Principáu y la Confrería de Pescadores alcordaron retardar hasta que terminara la temporada de pesca de la xarda, fueron axudicaes en 340.050 euros y van permitir estrayer casi 5.650 metros cúbicos de sedimentos ente les dársenes esterior ya interior.
Con esta actuación recuperaráse’l caláu na dársena interior a una cota negativa d’un metro, lo que va facilitar la entrada de les embarcaciones y la so estancia. Nel casu de la esterior, la cota de dragáu asítiase ente los -2,5 y los -3,5 metros, y los sedimentos estrayíos van xestionar en tierra. Les obres van tar llistes a finales de mayu, si les condiciones marítimes permiten el so normal desenvolvimientu.
Antes d’empezar estos trabayos, Mediu Rural yá dragó en marzu la canal d’accesu del puertu de Candás con La Nalona pa retirar los sedimentos que los distintos temporales foron atropando.
El compromisu del Gobiernu d’Asturies col caltenimientu de les infraestructures portuaries refléxase nuna medra d’un 36% de la inversión d’esti añu al respective de 2020, hasta algamar un presupuestu de 7,1 millones. D’esta cantidá, más d’un millón destínase al programa autonómicu de dragaos pa caltener el caláu de les instalaciones portuaries y ameyorar les condiciones de seguridá del sector pesqueru.
