El Gobiernu d’Asturies llogró aumentar un 21% el númberu de persones atendíes dende la puesta en marcha del plan de choque nel ámbitu de la dependencia, aprobáu en septiembre de 2019. Anguaño, reciben dalgún tipu de prestación 4.444 beneficiarios más que cuando s’activó esta midida, con un total de 25.000.
Otru de los resultaos de la implantación d’esta iniciativa foi la mengua a la metá de les llistes d’espera, tanto no que se refier a la reconocencia de la prestación como a la valoración del grau de dependencia. Anguaño, la mayoría de les árees sociosanitaries nun acumulen atrasos y resuelven los pidimientos en plazu.
La conseyera de Derechos Sociales y Bienestar, Melania Álvarez, ufiertó güei estos datos tres la xunta que celebró n’Avilés cola ministra de Derechos Sociales y Axenda 2030, Ione Belarra, y col secretariu d’Estáu de Derechos Sociales, Ignacio Álvarez, para tratar l’atención a la dependencia.
“El compromisu del Gobiernu d’España traduzse nun plan alliniáu col d’Asturies y na recuperación del nivel de financiamientu alcordáu, que taba suspendíu dende 2012 y que va inyectar 7,7 millones adicionales al sistema”, valoró Álvarez.
Amás, señaló que, no que va d’añu, la entrada de solicitúes pa la reconocencia de la dependencia creció un 45% respectu al mesmu períodu de 2020.
La titular de Derechos Sociales recordó, coles mesmes, qu’Asturies foi la única comunidá que presentó propuestes nes ocho llinies d’actuación plantegaes pol ministeriu dientro del plan de choque nacional, que son les siguientes: simplificación y axilización del procedimientu, funcionalidá informática, refuerzu de recursos humanos pa la xestión y la valoración, integración del procedimientu, inversión en recursos materiales, ampliación de servicios y prestaciones y calidá de datos del sistema.
