Melania Álvarez yá ye nueva senadora socialista en tomando posesión del so escañu ayeri al entamu de la sesión plenaria de la Cámara Alta. La parllamentaria asturiana llega al Senáu a propuesta del so partíu en representación de la Comunidá del Principáu d’Asturies y tres ser designada pol plenu de la Xunta Xeneral el pasáu 21 de febreru.
Sustitúi a Enrique Fernández, qu’arrenunció a la so acta de senador autonómicu para ser
nomáu presidente d’HUNOSA. Esta mesma tarde, el presidente del Senáu, Pedro Rollán, reclamó la presencia de Melania Álvarez al entamu de la sesión plenaria para toma-y declaración d’acatamientu frente a un exemplar de la Constitución. Una vegada qu’espresó la so promesa de respetar la Carta Magna, la senadora asturiana tomó posesión del so escañu na bancada del Grupu Socialista nel hemiciclu.
Melania Álvarez García nació en Candás (Asturies), el 13 d’agostu de 1979. Llicenciada en Ciencies Polítiques y de l’Alministración na especialidá de Relaciones Internacionales pola Universidá de Santiago de Compostela y máster en Marketing Políticu, Estratexes y Comunicación Política pol Institutu de Ciencies Polítiques y Sociales (Universidá Autónoma de Barcelona).
Foi conceyala d’Ordenación del Territoriu, Infraestructures, Vivienda y Medio Ambiente del Conceyu de Carreño (2007-2011) y directora xeneral de Participación Ciudadana na Conseyería de Presidencia y Participación Ciudadana na anterior llexislatura (2015-2019).
Foi conseyera de Derechos Sociales y Bienestar del Principáu d’Asturies dende 2019 hasta la so designación como senadora autonómica. Una vegada que tomó posesión del so escañu, la dirección socialista nel Senáu designó a la nueva senadora autonómica asturiana, vocera del PSOE d’Industria na Comisión d’Industria y Turismu. Coles mesmes, va formar parte como vocal de les comisiones Constitucional, de Derechos Sociales, Consumu y Axenda 2030, y de Polítiques Integrales de Discapacidá.
