Más de 400.000 persones esfrutaron del Festival Metrópoli que, ayeri, baxó’l telón y despidióse de les metropolitanes y metropolitanos hasta l’añu que vien. La BRESH, la fiesta más guapa del mundu, ponía’l broche a una edición ‘redonda’ na que’l balance ye “bien
positivu y satisfactoriu”, señalen dende la dirección del festival.

Polos escenarios de Metrópoli pasaron una ventena d’artistes que dexaron momentos
para l’alcordanza y que se sumen a la hestoria del festival. Los directores destaquen dalgunos bien especiales como “la despidida de Los Chichos, el conciertu so l’agua de Natos & Waor, los dos bises de la banda Amaral o l’estrenu del nuevu single de Marlon, ente otros munchos”. Dende l’escenariu Thunder Bitch, “vamos recordar d’esta undécima edición el carisma d’Alejo, la emoción del xixonés Mateo Eraña o la cumbia de Luck Ra”, añeden.

Son munches coses les que pasaron estos diez díes nel Recintu Ferial Luis Adaro como la Cómic Con, la más visitada de la hestoria del festival, que se convirtió nuna cita ineludible pa los amantes del cómic, el cine, les series, el cosplay y l’anime. La Tattoo Expo, les
charres, les esposiciones, MetroKids, los alcuentros, espectáculos como l’estrenu de ‘Radio Pajaronia’ de Joaquín Pajarón, l’espaciu Metropolitanes o’l Market.

Un añu más, Metrópoli volvió superase y conságrase como’l festival multidisciplinar por excelencia, convirtiéndose, ensin dulda dala, na cita ineludible de la cultura y del branu en
Xixón.